(තරංග ගුණරත්න)

මාතර කොට්ඨාශ දුෂණ මර්දණ ඒකකයේ නිලධාරීන් විසින් වැලිගම නගරයේ සිදු කළ සෝදිසි මෙහෙයුමකදී යතුරු පැදියක් භාවිතා කරමින් හෙරොයින් අලෙවි කිරිමේ ජාවාරමේ නියුතු සැකකරුවෙකු සමග රුපියල් ලක්ෂ 65 ක් පමණ වටිනා හෙරොයින් හා හොරොයින් අලෙවි කිරිමෙන් ලබා ගත් රුපියල් දස ලක්ෂ විසිදාහක මුදලක් සමග සැකකරුවකු අද (11) පස්වරුවේදී අත්අඩංගුවට ගත් බව මාතර කොට්ඨාස දූෂණ මර්දන අංශය පවසති.
 
ඊසි කැෂ් ක්‍රමයට වැලිගම ප්‍රදේශයේ හෙරොයින් අලෙවි කරනු ලබන බවට මාතර කොට්ඨාස භාර ජ්‍යෙෂ්ඨ පොලිස් අධිකාරී චන්දන හේරත් මහතාට ලද තොරතුරක් මත මාතර කොට්ඨාස දූෂණ මර්දන අංශයේ නිලධාරීන් විසින් මෙම වැටලිම කරනු ලැබ තිබේ.

එහිදී හෙරොයින් ඊසි කැෂ් ක්‍රමයට අලෙවි කිරිමට යොදා ගන්නා ලද ජංගම දුරකථන 3 ක්, හෙරොයින් ගැණුම්කරුවන්ට ලබා ගැනිමට තබා තිඛෙන ස්ථාන පිළිබදව සිතියම් ගත කොට ඇති පොත් කිහිපයක්, බැංකු ඒ.ටී.එම්. කාඩ්පත් කිහිපයක් ආදිය පොලීසිය විසින් සැකකරු සන්තකයේ තිබි සොයාගෙන තිබේ.

අත්අඩංගුවට ගත් සැකකරු ගාල්ල දික්කුඹුර අහංගම ප්‍රදේශයේ පදිංචි වයස 46 පුද්ගලයෙකු වන අතර සැකකරු කාලයක් ශ්‍රී ලංකා යුද හමුදාවේ සේවය කරමින් සිට පසුව පලා ආ පුද්ගලයකු බවට සිදු කළ විමර්ශන වලදී අනාවරණය තිබේ.

අත්අඩංගුවට ගත් සැකකරු අද දින මාතර මහේස්ත්‍රාත් අධිකරණයට ඉදිරිපත් කර දින 07 ක රැදවුම් නියෝග ලබාගෙන තවදුරටත් විමර්ශන කටයුතු මෙහෙවන බව පොලිසිය කියයි.