(සුජිත් හේවාජුලිගේ)

හිටපු ජනාධිපතිවරුන් පාවිච්චි කරන නිල නිවාසවල වටිනාකම  සම්බන්ධයෙන් සම්පූර්ණ තක්සේරු වාර්තා ලබා  ගැනීමට  රජය තීරණය කර ඇත.

මෙයට අමතරව ජනාධිපති  නිල නිවාස සහ හිටපු ඇමතිවරුන්ගේ නිල නිවාස සම්බන්ධයෙන්ද  තක්සේරු වාර්තා  ගැනීමට මේදිනවල කටයුතු කරමින් සිටින බව රජයේ ආරංචි මාර්ග සඳහන් කළේය.

හිටපු ජනාධිපති මහින්ද රාජපක්ෂ මහතාගේ විජේරාම මාවතේ  නිවස රජයේ තක්සේරු දෙපාර්තමේන්තුව ලවා පසුගිය සතියේ දී තක්සේරුවක් කරගෙන ඇති බවත් එම  තක්සේරුවට අනුව එහි මාසික කුලිය  ලක්ෂ 46 ක් බවත්  ආරංචි මාර්ග සඳහන් කරයි.

හිටපු ජනාධිපතිවරුන්ට හිටපු ඇමතිවරුන්ට මින් ඉදිරියට නිල නිවාස නොදීමට රජය තීරණයක් ගෙන ඇත.

එසේම ජනාධිපතිවරයාද නිල නිවාස ලබා නොගැනීමට තීරණය කර අැත

මෙම තක්සේරු කිරීම අාරම්භ කර ඇත්තේ එම තීරණයෙන් පසුව බව දැනගන්නට ඇත.

ඇමතිවරුන්ගේ නිල නිවාස සම්බන්ධයෙන් අප රාජ්‍ය පරිපාලන පළාත් සභා හා පළාත් පාලන අමාත්‍ය මහාචාර්ය චන්දන අබේරත්න  මහතාගෙන් කළ විමසුමකදී ඔහු පැවසුවේ  එම නිවාස වලින් කොටසක්  සංචාරක කටයුතු සඳහා පලදායි ලෙස  යොදා ගැනීමට බලාපොරොත්තු වන බවයි.

ඒ අනුව එම නිවාස සංචාරක මණ්ඩලයට පවරාදීමට කටයුතු කෙරෙනු ඇතැයිද  ඔහු සඳහන්  කළේය.

රණසිංහ ප්‍රේමදාස මහතාගේ   බිරිඳ හේමා ප්‍රේමදාස මහත්මියට පළමුව ස්ටැමෝර් චන්ද්‍රවංකයේ නිවසක්  ලබාදී තිබූ අතර  පසුව කොළඹ 07, ග්‍රෙගරි මාවත, සී 80 දරන නිවස ඇයගේ පදිංචියට  දෙන ලදී.

මෙරට හතරවන විධායක ජනාධිපතිවරිය වූ චන්ද්‍රිකා බණ්ඩාරනායක කුමාරතුංග මහත්මිය සිය විශ‍්‍රාම දිවිය ගත කිරීම සඳහා තෝරාගත්තේ නිදහස් මාවතේ අංක 27 දරන නිවසයි. විශාල භූමි භාගයක පිහිටි එම නිල නිවස ඇය අදටත් පරිහරණය කරන්නීය

මෙරට පස්වන විධායක ජනාධිපතිවරයා වූ මහින්ද රාජපක්ෂ මහතා ජනාධිපති ධුරයෙන් විශ‍්‍රාම ගැනීමෙන් පසු වත්මන් ජනාධිපති මෛත‍්‍රිපාල සිරිසේන මහතා ජනාධිපති ධුරයට පත්වීමට පෙර අමාත්‍යවරයෙකු ලෙස භාවිත කළ කොළඹ 07 විජයරාම මාවතේ අංක 11 දරන නිවස ඔහුගේ  නිල නිවස ලෙස පාවිච්චි කිරීමට දුන්නේය

විශ‍්‍රාම ගිය පසු ජනාධිපති මෛත‍්‍රිපාල සිරිසේන මහතා පදිංචියට තෝරාගෙන ඇති  මහගමසේකර මාවතේ නිවෙසේ   ඔහු දැනටත්  පදිංචිව සිටී

ගෝඨාභය රාජපක්ෂ මහතා කොළඔ 7 ස්ටැන්මෝ චන්ද්‍රවංකයේ  නිවෙසක පදිංචිව සිටී

විශ‍්‍රාම ගිය ජනාධිපතිවරයෙකුට නිල වශයෙන් හිමි වැඩකයුතු ඉටුකර ගැනීම සඳහා කාර්යාලයක් සහිත නිල නිවසක් ව්‍යවස්ථානුකූලව හිමිවෙයි.

විධායක ජනාධිපතිවරයෙකුට සිය ධුරයෙන් විශ‍්‍රාම ගැනීමෙන් පසු කැබිනට් අනුමැතියක් ඉල්ලා සිටිය ද, නොසිටිය ද නිල නිවසක් ලබාදීමට  රජය බැඳී  සිටින බවද  පැවසේ . එහි වගකීම ඇත්තේ ජනාධිපති කාර්යාලයට බවත්  සියලූම විධායක ජනාධිපතිවරුන්ගේ නිල නිවාස නඩත්තුව සහ සෙසු අයිතිවාසිකම්වල පරිපාලන බලය හිමිවන්නේ  ජනාධිපති ලේකම්වරයාට බවත් සදහන් වේ