අයහපත් කාලගුණය හේතුවෙන් මැතිවරණ ප්‍රතිපල නිකුත් කිරීම තරමක් ප්‍රමාද විය හැකි බව මැතිවරණ කොමසාරිස් මහින්ද දේශප්‍රිය මහතා පැවසීය. පළමු ප්‍රතිඵලය ලැබෙන්නේ කීයටදැයි මාධ්‍යවේදියකු ඇසූ පැනයකට පිළිතුරු දෙමින් අද සවස පැවැති මාධ්‍ය හමුවේදී ඒ මහතා එසේ සඳහන් කළේය.

ඡන්ද නීති කඩන අය සම්බන්ධයෙන් කළ විමසීමකදී අද දිනයේ අඩුම ගණනේ 50කටවත් බන්ධනාගාර භෝජනයේ රස බැලිය හැකි යැයි මැතිවරණ කොමසාරිස්වරයා කීවේය.

මැතිවරණ කාර්යාලයේ වෙබ් අඩවිය අද දිනයේ අක්‍රිය වීමට හේතුව බොහෝ පරිශීලකයන් පිරිසක් එකවර වෙබ් අඩවියට පිවිසීමට උත්සාහ කිරීම යැයිද ඒ මහතා එහිදී පැවසීය. එහි ධාරිතාව වැඩිකිරීමට අවශ්‍ය පියවර ගෙන ඇති බවත් ඔහු කීවේය.

පරිගණකය මගින් ඡන්ද ගණන් කිරීමේදී පක්ෂග්‍රාහී විය හැකි බවට දේශපාලනඥයකු ප්‍රශ්න කළ අවස්ථාවේ තමා ඔහුගෙන් ‘ඔබතුමා පාර්ලිමේන්තුවට පත්වුණේත් එසේදැයි‘ විමසු බවත් එවැනි අයත් එසේ ප්‍රශ්න කිරීමෙන් ව්‍යාජ සැකයන් සමාජ ගතකරන බවත් ඔහු සඳහන් කළේය.

ෆේස්බුක් මගින් කළ විමසීමකදී අයකු අලුත් පරිගණකයක් හඳුන්වාදී ඇත්දැයි කළ විමසීමකදී ඔබ ඇතුළු 50 දෙනකුට ඡන්ද ගණන් කිරීමේ මධ්‍යස්ථානයකට යාමට අවස්ථාව දෙන බවත් ඒ ක්‍රමය වැරදි නම් කියන්න එයාගේ චෝදනාව වැරදිනම් එයා අපිට වන්දි ගෙවන්න ඕන යැයි කොමසාරිස්වරයා කීවේය. පරිගණක මගින් ඡන්ද ගණනය කිරීමේ තාක්ෂණය අපට නැති බවත් ගණන් කිරීමේ නිලධාරීන් සිය අතින් ඒවා සිදුකරන බවත් ඔහු කීවේය.