වසර 2017ට නියමිත තෙවැනි  ආසියානු යොවුන් කී‍්‍රඩා උළෙල ශ්‍රී ලංකවේ හම්බන්තොට නගරයේදී පැවැත්වීමට ශ‍්‍රී ලංකාව උත්සාහ ගනිමින් සිටී. රටවල් 44ක් සහභාගී වන ආසියානු යොවුන් කී‍්‍රඩා උළෙලේ සත්කාරය දැරීමට වියට්නාමය හා මලයාසියාවද උනන්දුවක් දක්වන බව වාර්තා වන නමුත් එහි සත්කාරය ශ්‍රී ලංකාවට ලබා ගැනීමේ වැඩි ඉඩකඩක් පවතින බව ජාතික ඔලිම්පික් කමිටුවේ සභාපති හේමසිරි ප‍්‍රනාන්දු මහතා පවසයි. හේමසිරි ප‍්‍රනාන්දු මහතා හා ජාතික ඔලිම්පික් කමිටුවේ ලේකම් මැක්ෂි ද සිල්වා මහතා ඒ සම්බන්ධයෙන් ශ්‍රී ලංකාව ඉදිරිපත් කිරීමට නියමිත සක්‍යතා අධ්‍යයන වාර්තාව ගැන සාකච්ඡා කිරීම සඳහා සිංගප්පූරුවේ පිහිටි ආසියානු ඔලිම්පික් කමිටු මූලස්ථානය වෙත ගොස් සිටිති. එහිදි ඒ සම්බන්ධයෙන් සිංගප්පූරු ජාතික ඔලිම්පික් සභාව හා එහි ජාතික කී‍්‍රඩා අධිකාරියේ ප‍්‍රධානීන් සමගද ඊයේ (2) සාකච්ඡා කළ බවත් එහි සිට ”ලංකාදීප”යට අදහස් දැක්වූ හේමසිරි ප‍්‍රනාන්දු මහතා පැවසීය. ආසියානු යොවුන් කී‍්‍රඩා උළෙල ශ්‍රී ලංකාවේදී පැවැත්වෙන්නේ නම් ඊට පූර්ණ රාජ්‍ය අනුග‍්‍රහය දැක්වීමට ශ්‍රී ලංකා රජය සූදානම් බව ජනාධිපති මහින්ද රාජපක්ෂ මහතා ජාතික ඔලිම්පික් කමිටුවට මේ වන විට දැනුම්දී තිබේ. ඒ අනුව සත්කාරය හිමි වුවහොත් වසර 2018 පොදුරාජ්‍ය මණ්ඩලීය කී‍්‍රඩා උළෙල සඳහා ශ්‍රී ලංකාව සූදානම් කරමින් පැවැති කී‍්‍රඩා ගම්මානය නිමා කර එහිදී කී‍්‍රඩා උළෙල පැවැත්වීමට ශ්‍රී ලංකාව අවධානය යොමු කර ඇතැයි ජාතික ඔලිම්පික් කමිටුවේ මාධ්‍ය සම්බන්ධීකාරක බුද්ධික ඉද්දමල්ගොඩ මහතා පවසයි.  වසර 2018 පොදුරාජ්‍ය මණ්ඩලීය කී‍්‍රඩා උළෙලේ සත්කාරය හම්බන්තොට නගරයට අහිමි කරමින්  ඕස්ටේ‍්‍රලියාවේ ගෝල්ඞ් කෝස්ට් නගරය ඒ සඳහා සුදුසුකම් ලබා ගත්තේය. එයද සැලකිල්ලට ගනිමින් මෙරටදී ප‍්‍රධාන පෙළේ අන්තර්ජාතික කී‍්‍රඩා උළෙලක් ශ්‍රී ලංකාවේදී ඉදිරිවසර කීපය තුළදී සංවිධානය කළ යුතු බවට එහිදී ශ්‍රී ලංකා රජය තීරණයක් ගෙන තිබේ. ඒ අනුව ශ්‍රී ලංකාව දැන් ආසියානු යොවුන් කී‍්‍රඩා උළෙලේ සත්කාරය පිළිබඳව අවධානය යොමු කර තිබේ. මෙම කී‍්‍රඩා උළෙල අවසන් වරට 2010 දී සිංගප්පූරුවේදී පැවැත්විණි.