(යොහාන් භාසුර)

වර්තමාන ආණ්ඩුව ඉදිරිපත් කළ අයවැයෙන් වෛද්‍යවරුන්ගේ මූලික වැටුප ඉහළ දැමීම සාධාරණ වුවද සෙසු දීමනා අනුපාතය අඩු කිරීම සර්වසාධාරණ නොවන බවත් ඒ පිළිබඳව ආණ්ඩුව සමඟ සාකච්ඡා කරමින් සිටින බවත් සමස්ත ලංකා වෛද්‍ය නිලධාරීන්ගේ සංගමයේ ජ්‍යෙෂ්ඨ නියෝජ්‍ය ලේකම් වෛද්‍ය ගයාන් අබේගුණවර්ධන මහතා අද (28) පැවසීය.

වෛද්‍යවරුන්ගේ මූලික වැටුපට සාපේක්‍ෂව අමතර රාජකාරිවලට ගෙවන අනුපාත අඩුකර ඇතැයි වෛද්‍යවරු තුළ කණස්සල්ලක් පවතින බව කියන වෛද්‍ය ගයාන් අබේගුණවර්ධන මහතා අමතර රාජකාරිවලට ගෙවූ මූලික වැටුපෙන් 80 න් 1 ක කොටස 120 න් 1 ක් දක්වාත්, නිවාඩු දින රාජකාරිවලට ගෙවූ 20 න් 1 ක 30 න් 1 ක් දක්වාත් අඩු කිරීමට අයවැයෙන් යෝජනා කර ඇති බව ද ඒ මහතා කීය.

මූලික වැටුප ඉහළ දැමුව ද අමතර රාජකාරී සහ නිවාඩු දින දීමනාවේ පැයක වටිනාමක අඩුකර ඇති බවත් ඒ සම්බන්ධයෙන් වෛද්‍යවරුන්ගේ කළකිරීම සාධාරණ බවත් ඒ මහතා සඳහන් කළේය.

කෙසේ වෙතත් අතිකාල දීමනා ගෙවන ප්‍රමාණය යම් ප්‍රමාණයකින් වැඩි කරමින් ප්‍රාථමික ශ්‍රේණියේ වෛද්‍යවරයකුට ගෙවූ රුපියල් 687 රුපියවල් 794 ක් දක්වා ද, දෙවැනි ශ්‍රේණියේ වෛද්‍යවරයකුට ගෙවූ රුපියල් 796 රුපියල් 907 ක් දක්වා ද, පළමු ශ්‍රේණියේ වෛද්‍යවරයකුට ගෙවූ රුපියල් 1005 රුපියල් 1875 දක්වා ද, අතිකාල දීමනාව ඉහළ දමා ඇතැයි ද ඒ මහතා පැවසීය.

වෛද්‍යවරුන්ගේ මූලික වැටුප පවා මීට වඩා හොඳ එකක් වියයුතු කී අබේගුණවර්ධන මහතා වැටුප් වැඩිවීමේ අවසන් ප්‍රතිඵලය ජනතාවට වඩාත් හොඳ සේවයක් ලැබීම බවට පත්වියයුතු බව ද සඳහන් කළේය.