මහනුවර ජාතික මූලික අධ්‍යයන ආයතනයේ පෝෂණ ජෛව රසායනය පිළිබද පර්යේෂණ ඒකකයේ අංශ ප්‍ර‍ධාන, ආචාර්ය රුවිනි ලියනගේ මහත්මිය

අපට වැළදෙන සෙම්ප්‍ර‍තිශ්‍යාව, කැස්ස, උණ වැනි රෝග වලදී පුරුද්දක් වශයෙන් බොහෝ දෙනා නිවසේදීම දේශීය ඖෂධ වර්ග වලින් කසාය වර්ග තම්බලා පානය කිරීම සිදු කරති. එවැනි කසාය වර්ග වලින් අතුරු ආබාධයක් නැතිවම අපේ අසනීප හොඳ වන බව අත්දැකීමෙන්ම අපි දනිමු. දේශීය බෙහෙත් වර්ග වල තියන ලෙඩ හොඳ කිරීමේ හැකියාව කුමක්ද? එම හැකියාව වෙනත් ලෙඩ රෝග පාලනය කිරීමට යොදා ගැනීමට නොහැකිද? මෙම ප්‍ර‍ශ්නය පැන නගින්නේ දේශීය ඖෂධ වල වටිනාකම යම්තාක් හෝ වැටහුණ පුද්ගලයන්ටය. දේශීය වෛද්‍ය විද්‍යාවේදී නිතර භාවිතා වන ඖෂධ වර්ග 10 ක (බෙලි මල්, ඉරමුසු, රණවරා, වල් කොත්තමල්ලි, නෙල්ලි, රසකිද, පොල්පළා, බැබිල, බෙලි ගැට සහ වෙනිවැල්) කෘත්‍යාත්මක ගුණ පිළිබඳව අධ්‍යනයක් ආරම්භ ක‍ළේය.

ශාක වල කෘත්‍යාත්මක ගුණ අතරින් ශරීරයේ ලෙඩ රෝග පාලනයට ඉතා වැදගත් ගුණයක් වන්නේ එම ශාක වල දක්නට ලැබෙන ප්‍ර‍තිඔක්සිකාරක ගුණයයි. ශාක වලට මෙම ප්‍ර‍ති ඔක්සිකාරක ගුණ ලැබෙන්නේ එම ශාක වල නිපදවන ද්වීතීයික පරිවෘත්තීය සංඝටක වලිනි. ඒ අතරින් ෆීනෝලික , ෆ්ලෙවනොයිඩ් රසායනික සංඝටක ප්‍ර‍ධානයි. අපේ ශරීරය  තුළ විවිධ අහිතකර හේතු නිසා වැරදි ජීවන රටා, නරක ආහාර පුරුදු සහ මානසික ආතතිය නිපදවන සහ ශරීරයට බාහිරින් ඇතුළු වන මුක්ත ඛණ්ඩක නිසා ඔක්සිකරණ ආතතියක් ශරීරයේ ඇතිවේ.

ඔක්සිකරණ ආතතිය නිසා ශරීරයේ ඉන්ද්‍රියන් වල පටක වල ඩී.එන්.ඒ. ප්‍රෝටීන් සහ ලිපිඩ වලට හානි සිදුවේ. සෙම්ප්‍ර‍තිශ්‍යාව, කැස්ස, උණ වැනි සාමාන්‍ය රෝග වලදී වගේම දියවැඩියාව, හෘද රෝග, පිළිකා වැනි දරුණු රෝග වලටත් මූලික හේතුවක් වේ. ඔක්සිකරණ ආතතිය මගින් සෛල වලට සිදුවන හානිය අපි ගන්නා  දේශීය ඖෂධ වර්ග වල පොදුවේ  ප්‍ර‍තිඔක්සිකාරක ගුණ  බහුලයි. ප්‍ර‍තිඔක්සිකාරක ගුණ  වලට  ශරීරයේ ඇතිවන ඔක්සිකරණ  ආතතිය මර්ධනය කර ශරීරය නැවත යථා තත්ත්වයට පත් කිරිම සඳහා පර්යේෂණ කණ්ඩායම සිදු කළේ තෝරා ගත් දේශීය ඖෂධ වර්ග වල ප්‍ර‍තිඔක්සිකාරක හැකියාව අධ්‍යනය සිදුකිරීමයි.

මෙහිදි පර්යේෂණ කණ්ඩායම විශ්ලේෂණ සදහා දේශීය ඖෂධ වර්ග වල නිස්සාරණ පිළියෙළ කළේ සාම්ප්‍ර‍දායිකව ඖෂධීය පානයන් පිළියෙළ කරන ආකාරයටම වියළි ඖෂධ වර්ග ජලය සමඟ උණු කිරීමෙනි. පසුව ක්‍ර‍ම 3 කට එම ඖෂධ වර්ග වල ප්‍ර‍තිඔක්සිකාරක හැකියාව විශ්ලේෂණය කරන ලදි. පරීක්ෂණ වල ප්‍ර‍තිළුල වලට අනුව පිළිවෙළින් නෙල්ලි, රණවරා, බෙලි මල්, බෙලි ගැට සහ වල් කොත්තමල්ලි ඉහළ ප්‍ර‍තිඔක්සිකාරක හැකියාවකින් යුක්තය. මෙම  පරීක්ෂණයේ සුවිශේෂි ප්‍ර‍තිළුලය නෙල්ලි වල පවතින ප්‍ර‍තිඔක්සිකාරක හැකියාවයි. නෙල්ලි වල තියන ප්‍ර‍තිඔක්සිකාරක හැකියාව අනෙකුත් ඖෂධ වර්ග වල ප්‍ර‍තිඔක්සිකාරක හැකියාවට වඩා ඉතා ඉහළ අගයක් ගනියි.

           ඖෂධ වර්ග වල මුළුපීනෝල් සහ ෆැලවනොයිඩ් අන්තර්ගතය

ඉහත සඳහන් ඖෂධ වල ඇල්ෆා ඇමයිලේස් ප්‍ර‍තිෂේධාත්මක ගුණය ද අධ්‍යයනය කළා. ඇල්ෆා ඇමයිලේස් යනු අපි ගන්නා ආහාර වල තියන පිෂ්ඨය මෝල්ටෝස්, මෝල්ටොට්‍රයෝස් වැනි ඩයිසැකරයිඩ වලට බිඳ හෙලන එන්සයිමයකි. දෙවන වර්ගයේ දියවැඩියාවෙන් පෙළෙන රෝගීන්ට මෙම එන්සයිමයේ ක්‍රියාකාරීත්වය අඩපණ කිරීම මගින් රුධිරයේ ග්ලූකෝස් මට්ටම පාලනය කරගැනීම පහසු වේ. ඇල්ෆා ඇමයිලේස් ප්‍ර‍තිෂේධාත්මක ගුණය තියන ඖෂධ වර්ග වලට පුළුවන් රුධිරයේ ග්ලූකෝස් මට්ටම යාමනය කිරීමට උපකාරී වේ. විශ්ලේෂණයෙන් ලැබුණ ප්‍ර‍තිළුල අනුව නෙල්ලි සහ රණවරා වල ඇල්ෆා ඇමයිලේස් ප්‍ර‍තිෂේධාත්මක ගුණය ඉහළ අගයක් ගෙන තිබේ.

මෙම පරීක්ෂණ වලින්,  පුරාතනයේ සිට පාරම්පරික වෙදකමේදි භාවිතා කරන ඖෂධ වර්ග වල තියන රසායනික සංඝටක සහ ඒවායේ ක්‍රියාකාරීත්වය විද්‍යාත්මක ක්‍ර‍ම මගින් දේශීයව හඳුනා ගැනීමට සමත්වී තිබේ. ලෝකයේ අනෙකුත් රටවල් වල වගේම ශ්‍රී ලංකාව තුළත් දියවැඩියාව, අධි රුධිර පීඩනය, පිළිකා සහ හෘද රෝග වැනි බෝ නොවන රෝග වේගයෙන් පැතිරේ. ඒවාට හේතුවන ඔක්සිකරණ ආතතිය මැඩලන්න වගේම රුධිරයේ සීනි මට්ටම යාමනය කිරීමටත් මේ නෙල්ලි වලට ඉතා ලොකු හැකියාවක් තිබෙන බව මෙම පර්යේෂණ වලින් හෙළිවේ. මෙම ගුණ නිසාම තමා අතීතයේ සිටම බොහෝ ලෙඩ රෝග වලට ‍ ඖෂධ නිපදවීමේදී නෙල්ලි අත්‍යාවශ අංගයකි. ඖෂධීය වටිනාකමක් තියන දේශීය ඖෂධ වර්ග වර්තමානයේදී අපි ප්‍රයෝජනයට ගන්නේ ඉතා අඩුවෙනි.

එක දවසකට එක නෙල්ලි ගෙඩියක් කෑවොත් එයින් මුලු දවසටම සරිලන ප්‍ර‍තිඔක්සිකාරක හැකියාව ශරීරයට ලැබේ. නෙල්ලි වගේම රණවරා, බෙලි මල්, බෙලි ගැට සහ වල් කොත්තමල්ලිත් ප්‍ර‍තිඔක්සිකාරක හැකියාවෙන්  සහ ඇල්ෆා ඇමයිලේස් ප්‍ර‍තිෂේධාත්මක ගුණයෙන් අනූනයි. රණවරා, බෙලි මල්, බෙලි ගැට සහ වල් කොත්තමල්ලි වැනි ඖෂධ වලින් සාදන පානයන් අතීතයේ මිනිසුන් සුලභව පානය කළා. ඒ අතීතයේ සිටම අත්දැකීමෙන් ඒවායේ ගුණයන් දැන සිටි නිසා. වර්ථමානයේදී මෙවන් වටිනා දේශීය පර්යේෂණ තුලින් නැවත විද්‍යාත්මක ක්‍ර‍මයට එම ගුණ මතු කිරීමේ අභිප්‍රාය වන්නේ ජනතාව මෙම වටිනා දේශීය ඖෂධ වලින් නිසි ප්‍රයෝජන ලබාගෙන නිරෝගිමත් ජීවිත ගත කිරීමයි.