උපුල් වික්‍රමසිංහ
ජනාධිපතිවරණ කාලසීමාවේදී මැතිවරණ නීති උල්ලංඝනය කිරීමට අදාළව සමාජ මාධ්‍ය ජාලා සම්බන්ධයෙන් ලැබෙන පැමිණිලි විමර්ශනය කිරීම සඳහා ඊට අදාළ තාක්ෂණික දැනුම සහිත කණ්ඩායමක් පත් කර ඇති බව මැතිවරණ කොමිෂන් සභාව කියයි. එම කොමිසමේ සභාපති ආර්.එම්.ඒ.එල්. රත්නායක මහතා ඉරිදා ලංකාදීපයට පැවසුවේ ඉන්ස්ටග්‍රෑම් සහ ටික්ටොක් කෙරෙහි විශේෂ අවධානයක් යොමු කර ඇති බවය. එම කණ්ඩායම ඉන්ස්ටග්‍රෑම් සහ ටික්ටොක් සමාජ මාධ්‍ය ආයතන සමග නිරන්තරයෙන් සම්බන්ධ වෙමින් මැතිවරණ නීති උල්ලංඝනය කරන ගැටලුසහගත පෝස්ට් ඉවත් කිරීමට අදාළ වැඩපිළිවෙළක් මේ වෙනවිටත් සකස් කරමින් සිටින බව ද සභාපතිවරයා හෙළි කළේය.

ජනාධිපතිවරණයේ නාමයෝජනා භාර ගැනීමෙන් පසු එම වැඩපිළිවෙළ ක්‍රියාත්මක කරන බව ද රත්නායක මහතා පැවසීය. මේ අතර පසුගිය 09 වැනිදා රජයේ ප්‍රවෘත්ති දෙපාර්තමේන්තුවේ පැවති වැඩමුළුවක් අමතමින් මැතිවරණ කොමිෂන් සභාවේ නියෝජ්‍ය මැතිවරණ කොමසාරිස් පියුමි ආටිගල මහත්මිය පැවසී යැයි මාධ්‍ය වාර්තා කර තිබුණි සමාජ මාධ්‍ය සම්බන්ධයෙන් පැමිණිලි රැසක් මැතිවරණ කොමිසමට ලැබී ඇති බැවින් ජනාධිපතිවරණ කාලසීමාවේදී ඒ සම්බන්ධයෙන් කොමිසමේ අවධානය යොමු ව ඇති බවත් එහිදී ඉන්ස්ටග්‍රෑම් සහ ටික්ටොක් කෙරෙහි විශේෂ අවධානයක් යොමු කර ඇති බව ඇය පවසා තිබුණි. 
එම සමාජ මාධ්‍ය ජාල හිමි ආයතන සමග සෘජු සබඳතා පවත්වා ගෙන යන බව ද එහිදී ඇය වැඩිදුරටත් සඳහන් කර තිබේ.
මැතිවරණ නීති උල්ලංඝනය කිරීම්වලට අදාළව මේ දක්වා මැතිවරණ කොමිසමට කොපමණ පැමිණිලි ප්‍රමාණයක් ලැබී ඇත්දැයි දැනගැනීමට අප ආටිගල මහත්මිය දුරකථනයෙන් සම්බන්ධ කර ගැනීමට අවස්ථා කිහිපයකදී උත්සාහ කළ ද එය ව්‍යර්ථ විය.
ඉකුත් 08 වැනිදා නිවේදනයක් නිකුත් කරමින් මැතිවරණ කොමිෂන් සභාව දන්වා සිටියේ ජූලි 31 වැනිදා සිට අගෝස්තු 08 වැනිදා දක්වා පැමිණිලි 157 ක් ලැබී තිබුණු බවය.