(ආර්.එෆ්.එම්.සුහෙල්)

නුවරඑළිය නගර ආසන්නයේ කොන්ක්‍රීට් තනමින් සිටී පෙදරේරුවන් දෙදෙනෙකුගේ ඇඟට අඩි 25ක් උස තාප්පයක් අද (16) සවස කඩා වැටී පුද්ගලයන් දෙදෙනා එම ස්ථානයේම ජීවිතක්ෂයට පත්වූ බව නුවරඑළිය පොලිසිය සඳහන් කරයි.

නුවරඑළිය නගර ආසන්නයේ වැඩබන් පාර පරණ කච්චේරිය අසල නිවසක 9 දෙනෙකුගෙන් යුතු පෙදරේරු වෘත්තිකයින් කණ්ඩායමක් තාප්පයක් හදමින් සිටියදී එහි යාබදව කොන්ක්‍රීට් අනමින් සිටි පෙදරේරුවන් දෙදෙනා මතට තාප්පය කඩාවැටී ඇති අතර අනතුර සිදු වූ ස්ථානයේම එම පුද්ගලයන් දෙදෙනා මියගොස් ඇති බව නුවරඑළිය පොලිසිය කියයි.

මෙලෙස මියගොස් ඇත්තේ ගාල්ල ඇල්පිටිය වැලිහේන මත්තක ප්‍රදේශයේ පදිංචි පී.එම්.සී රුක්ෂාන් (23) සහ කේ.නිලන්ත (43) යන අය වෙති.

මෙම අනතුර පස්වරු 04.00 ට පමණ සිදුවී ඇති අතර එම ස්ථානයෙන් සේවය කරමින් සිටි අනෙකුත් පෙදරේරුවන්ගේ සහ ප්‍රදේශවාසීන්ගේ  සහය ඇතිව කඩා වැටුණු තාපපයේ කොටස් සිරුරු මතින් ඉවත් කර පස්වරු 5.00ට පමණ වන මියගිය පුද්ගලයන්  දෙදෙනාගේ සිරුරු නුවරඑළිය දිස්ත්‍රික් මහ රෝහල වෙත රැගෙන යාමට නුවරඑළිය පොලිසිය කටයුතු කර ඇත.

හෙට දින අධිකරණ වෛද්‍යවරයා වෙත දේහයන් ඉදිරිපත් කර  පශ්චාත් මරණ පරීක්ෂණ සිදුකිරීමෙන් අනතුරුව ගාල්ල ඇල්පිටිය ප්‍රදේශයට සිරුරු රැගෙන යාමට නියමිත බව නුවරඑළිය පොලීසිය වැඩිදුරටත් පවසයි .