(ඩයනා උදයංගනී)

දිවයිනේ ප්‍රදේශ රැසකට බලපා ඇති වැසි තත්වය අදින් (21) පසු තරමක් අඩුවනු ඇතැයි කාලගුණ විද්‍යා දෙපාර්තමේන්තුව පවසයි.

එසේ වුවත් අද (21) දිනයේත් නැගෙනහිර සහ ඌව පළාත්වලත්, පොළොන්නරුව සහ මාතලේ දිස්ත්‍රික්කවලත් සිහින් වැසි වාර කිහිපයක් ඇතිවන අතර, සබරගමුව පළාතේත්, කළුතර, ගාල්ල සහ මාතර දිස්ත්‍රික්කවලත් සවස් කාලයේ හෝ රාත්‍රී කාලයේ දී තැනින් තැන වැසි හෝ ගිගුරුම් සහිත වැසි ඇතිවන බව එම දෙපාර්තමේන්තුව නිකුත් කළ නිවේදනයක දැක්වේ.

ගිගුරුම් සහිත වැසි සමඟ ඇතිවිය හැකි තාවකාලික තද සුළං හා අකුණු අනතුරුවලින් ආරක්‍ෂාවීමට පියවර ගන්නා ලෙස ද කාලගුණ විද්‍යා දෙපාර්තමේන්තුව ජනතාවට දැනුම්දීමක් කර ඇත.

මෙම දිනවල පවතින වැසි තත්වය ක්‍රමයෙන් අඩුවී ගියත්, ලබන 27, 28 දිනවල යළිත් වැසි තත්වයේ වැඩිවීමක් අපේක්‍ෂා කරන බව එම දෙපාර්තමේන්තුවේ ප්‍රකාශකයකු පැවසීය. මේ දිනවල දිවයිනට බලපා ඇති ඊසාන දිග මෝසමේ සක්‍රීය තත්වයක් හේතුවෙන් මෙම වැසි ඇතිවන බව ද ඔහු සඳහන් කළේය.