දකුණු පළාතේ සාරවත් තේ වතු වලින් සහ කුඹුරුවලින් යුත් මොරවක නම් ගම්බද නගරයේ වාසය කළ රම්‍යා නොයෙකුත් බාධක කම්කටොළු මැද අවසානයේ සිඟිති දියණියකගේ මවක් වූවාය.

රම්‍යාගේ දරු ප්‍රසූතිය අවදානම් එකක් වූ අතර දියණියට උපත ලබා දෙන මොහොතේ ප්‍රථමයෙන් පෙකණි වැල ගර්භාෂයෙන් එළියට පැමිණීම නිසා වඩාත් සැලකිලිමත් වීමට සිදුව ඇත.එම තත්ත්වය ඇතිවන ගර්භනී මව්වරුන් ප්‍රසූත කරන දරුවන්ගේ රුධිර සහ ඔක්සිජන් සැපයුම ඒ හේතුවෙන් අවහිර වීමේ අවදානමක් ඇතිවේ.

නමුත් රම්‍යාගේ දියණිය එවැනි අවදානමකට මුහුණ නොදී ආරක්ෂිතව මෙලොව එළිය දුටුවාය.රම්‍යාගේ දියණිය එවැනි අවදානම් තත්ත්වයක් තුළ ආරක්ෂිතව මෙලොව එළිය දුටුවේ රෝහලක් තුළ නොව සුවසැරිය ගිලන් රථයක් තුළය.

ඩිජිටල් තාක්ෂණයෙන් උසස් ලොව ප්‍රමුඛ පෙළේ ගිලන් රථ සේවාවලින් එකක් වන සුවසැරිය ගිලන් රථ සේවය නොමිලේ සපයන සේවාවක් වීමද විශේෂත්වයකි.

සුව සැරිය ගිලන් රථ සේවය 2016 වසරේ ආරම්භ වූ අතර මේ දක්වා මිලියන 1.8 කට වැඩි ජනතාවක් 1990 ගාස්තු රහිත දුරකතන අංකය අමතා උදව් ඉල්ලා ඇත.1990 දුරකතන අංකයට ඇමතුමක් ලබාදී විනාඩි 12 වැනි කෙටි කාලයක් තුළදී රෝගී වූවන් ප්‍රාථමික ප්‍රතිකාර ඒකකයකට හෝ රෝහලක් වෙත රැගෙන යාමට සුව සැරිය ගිලන් රථ සේවය සමත් වී තිබේ.එය ගිලන් රථ සේවයක් උදව් ඉල්ලා ලබා දෙන දුරකතන ඇමතුමකට ප්‍රතිචාර දැක්වීමට ගතවන අඩුම කාලවලින් එකක්ද වේ.

රෝගියෙකු රෝහල වෙත ඇතුළත් කිරීමට පෙර ලබාදිය යුතු සියලුම ප්‍රතිකාර ඉතා උසස් ලෙස ලබා දෙමින් පසුගිය වසර හතක කාලය තුළදී සුව සැරිය ගිලන් රථ සේවය ජීවිත විශාල සංඛ්‍යාවක් බේරා ගැනීමට සමත් වී ඇත.ප්‍රතිකාර ප්‍රමාදවීම හේතුවෙන් ඇතිවිය හැකි සංකූලතා අවම කරමින් රටේ ආර්ථිකයට ධනාත්මක දායකත්වයක් ලබා දීමට සුව සැරිය ගිලන් රථ සේවයට හැකියාව ලැබී තිබේ.

සුව සැරිය ගිලන් රථ සේවය ලබා දෙන අත්දැකීමෙන් අපට ඉගෙන ගත හැකි කරුණු රාශියක් ඇත.සුව සැරිය ගිලන් රථ සේවය අනුකරණය කරමින් මෙවැනිම සේවයක් දකුණු ආසියාවේ අනෙක් රටවලද ක්‍රියාත්මක කිරීම ආඩම්බර විය හැකි සම්ප්‍රදායක් ඉදිරියට ගෙන යාමක් වනු ඇතැයි නොඅනුමානය.

2018 පාර්ලිමේන්තු පනතක් මගින් සුවසැරිය ගිලන් රථ සේවය පිහිටුවන ලදි.සුව සැරිය ගිලන් රථ සේවය රජය යටතේ ක්‍රියාත්මක වන සේවයක් වුවත් එම සේවයට පෞද්ගලික අංශයේ සංවිධානයක කඩිසරකම සහ ස්වාධීනත්වය තිබේ.එහි ප්‍රතිඵලයක් ලෙස කැපී පෙනෙන කාර්යක්ෂමතාවයක් සුව සැරිය ගිලන් රථ සේවයට තිබෙන අතර රාජ්‍ය සේවයක තිබිය යුතු ප්‍රමිතිය පිළිබඳ නව මිනුම් දණ්ඩක් හඳුන්වා දීමට එම සේවයට හැකියාව ලැබී ඇත.

ලෝක බැංකුවේ දකුණු ආසියානු කලාපයේ උප සභාපතිවරයෙකු වන මාර්ටින් රේසර් මහතාට පාර්ලිමේන්තු මන්ත්‍රී හර්ෂ ද සිල්වා මහතා සුව සැරිය ව්‍යාපෘතිය විස්තර කර දී තිබුණේ බල ලෝභී දේශපාලනයට ඉහළින් තිබෙන ජීවිත බේරා ගැනීම කෙරෙහි සුවිශේෂී අවධානයක් යොමු කළ ද්විපාර්ශ්වික සහයෝගයේ බලය පිළිබඳ සාක්ෂියක් ලෙස ය.

සුව සැරිය ගිලන් රථ සේවයේ කොඳු නාරටිය තාක්ෂණය වේ.සැපයුම් මෙහෙයුම්වල සිට වාර්තාගත කාලයක් තුළදී ප්‍රතිචාර දැක්වීම දක්වා ක්‍රියාවලිය අඛණ්ඩව වැඩි දියුණු කර ගැනීමට සුව සැරිය ගිලන් රථ සේවයට ඇති කැපවීම සැමට දැකගත හැක.සුව සැරිය ගිලන් රථ සේවයේ පර්යේෂණ සහ සංවර්ධන අංශය හදිසි ප්‍රතිචාර පද්ධතියට කෘතිම බුද්ධිය ඒකාබද්ධ කරන්නේ කෙසේදැයි සොයා බලමින් සිටී.කාර්ය මණ්ඩලයට නව තාක්ෂණය පිළිබඳව සහ නව පද්ධතීන් පිළිබඳව දැනුම ලබා දීමට මෙන්ම රාජ්‍ය මූල්‍ය පීඩනයට ලක් නොවන පරිදි නව්‍ය අරමුදල් ප්‍රවාහයන් සොයා ගැනීම පිළිබඳව සුව සැරිය ගිලන් රථ සේවය සැමවිටම අවධානය යොමු කරයි.

ප්‍රධාන වශයෙන් පුද්ගලික අංශයේ ස්වේච්ඡා සේවකයන්ගෙන් සමන්විත මණ්ඩලයක් මගින් පාලනය වීම සහ රාජ්‍ය සේවය ක්‍රියාත්මක වීමේදී එල්ල වන බාධාවන්ගෙන් තොරවීම හේතුවෙන් සුව සැරිය ගිලන් රථ සේවයට ජීවිත බේරා ගැනීම සඳහා තීරණාත්මක වන ඉක්මන්, පුළුල් තීරණ ගැනීමට හැකියාව ඇත.

දකුණු ආසියාව තුළ ඩිජිටල්කරණය සියලු දේ වෙනස් කරමින් සිටී, ඩිජිටල් නවෝත්පාදනයට ප්‍රමුඛත්වය දෙමින් සුව සැරිය ගිලන් රථ සේවයද වෙනස්වන ලෝකයට ගැලපෙන පරිද්දෙන් සිය සේවය නවීකරණය කර තිබේ.සුව සැරිය ගිලන් රථ සේවයේ වේගය සහ කාර්යක්ෂමතාව පැමිණෙන්නේ එහි ක්‍රියාවලි සහ මෙහෙයුම්වලට ඩිජිටල් තාක්ෂණය එක් කිරීම හේතුවෙනි.

උදව් ඉල්ලා පුද්ගලයෙකු දුරකතන ඇමතුමක් ලබා දුන් විට එම ස්ථානයට ළඟම ගිලන් රථය නොව ඉක්මනින්ම ළඟා විය හැකි ගිලන් රථය හඳුනාගැනීමට සුව සැරිය ගිලන් රථ සේවය විසින් විශේෂිත ඇල්ගොරිතමයක් භාවිත කරනු ලබයි.එසේම ඇමතුම ලබා දුන් පුද්ගලයාගේ ස්ථානය නිරීක්ෂණය කිරීම සඳහා සුව සැරිය යෙදුමක් භාවිත කරනු ලබන අතර ගිලන් රථවල ඇති ඉන්ධන ප්‍රමාණයද ඩිජිටල් තාක්ෂණය ඔස්සේ නිරීක්ෂණය කරනු ලබයි.

කනෙක්ටඩ් ඇම්බ්යුලන්ස් නම් නියමු වැඩසටහනක් යටතේ ගිලන් රථය තුළදී නව තාක්ෂණයේ ආධාරයෙන් වෛද්‍යවරුන්ට රෝගීන්ට ප්‍රතිකාර ලබා දීමට ඇති හැකියාව පිළිබඳ සුව සැරිය ගිලන් රථ සේවය අධ්‍යනය කරමින් සිටී.

රෝගීන්ට පූර්ව රෝහල් ප්‍රතිකාර ලබා දීමේදී තිබූ බරපතල හිඩැසක් පුරවමින් හදිසි ගිලන්රථ සේවාව සහ ප්‍රාථමික සත්කාර පහසුකම් අතර සම්බන්ධතාව වැඩිදියුණු කිරීම මගින් 1990 සුවසැරිය ශ්‍රී ලංකාවේ ප්‍රාථමික සෞඛ්‍ය සේවා පද්ධතිය ශක්තිමත් කරමින් රෝගීවූ මිලියන සංඛ්‍යාත ජනතාවකට ජීවත්වීමට දෙවැනි අවස්ථාවක් ලබාදෙයි.

කොවිඩ් වසංගතය පැවති සමයේදී 175000 කට අධික කොවිඩ් රෝගීන් සංඛ්‍යාවක් සුව සැරිය ගිලන් රථ සේවය මගින් රෝහල් වෙත යොමුකර ඇති අතර හෘද රෝගීන්ට නව බලාපොරොත්තුවක් ලබා දීමටද සුව සැරිය සමත් වී ඇත.විශේෂයෙන් සෞඛ්‍ය සේවා ලබා ගැනීමට අපහසු ගම්බද ප්‍රදේශවල ජනතාවට සුව සැරිය බෙහෙවින් ප්‍රයෝජනවත් වී තිබේ.

(ලෝක බැංකුව පළ කළ ලිපියක් ඇසුරෙන් විමුක්ති එස් රුද්‍රිගු)