(රෝෂන් තුෂාර)

ගල් ඇඳිවල හාල් වැවේ වැව් බැම්ම ප්‍රතිසංස්කරණය කළ කොන්ත්‍රාත්කරුගෙන් රුපියල් ලක්ෂ දෙකක මුදලක් ඉල්ලා ලක්ෂයක අල්ලසක් ලබා ගත්තේ යැයි කියන හිඟුරක්ගොඩ පරාක්‍රම ගොවි සමිතියේ ලේකම්වරයා ලබන 10 වෙනි දින දක්වා රක්ෂිත බන්ධනාගාර ගත කිරීමට කොළඹ ප්‍රධාන මහේස්ත්‍රාත් තිළිණ ගමගේ මහතා අද(27) නියෝග කළේය.

අල්ලස් හෝ දූෂණ විමර්ශන කොමිසම් මගින් අත්අඩංගුවට ගෙන අධිකරණයට ඉදිරිපත් කළ කමල් දිසානායක නැමැති සැකකරු මෙසේ බන්ධනාගාර ගත කළේය.

වැව් බැම්ම පිළිසකර කිරීම සඳහා රජයෙන් ලක්‍ෂ 16ක මුදලක් කොන්ත්‍රත්කරුට ගොවි සමිතිය හරහා ලබා දී ඇති බවත්,ගොවි සමීතියට හිමි විය යුතු සියයට පහක කොටස තබාගෙන ඉතිරි රුපියල් 1587400.00 මුදල නිදහස් කර දීම සඳහා ලක්ෂ දෙකක අල්ලස් මුදලක් ඉල්ලා ඇති බව අල්ලස් කොමිසමේ නිලධාරීන් අධිකරණයට කරුණු ඉදිරිපත් කරමින් පැවසීය.

කොන්ත්‍රාත්කරු විසින් කොමිසමට කරන ලද පැමිණිල්ලක් අනුව උපාය දූතයින් යොදවා සැකකරු අත්අඩංගුවට ගත් බව ද කරුණු ඉදිරිපත් කළේය.