( තිළිණි ද සිල්වා සහ රංජන් කටුගම්පොළ )

වර්තමානයේ පවතින හා මේ වන විට අහෝසි වී ඇති අමාත්‍ය ධුර සම්බන්ධයෙන් සොයා බලා සති දෙකක් ඇතුළත ඊට අදාළ වාර්තාවක් ඉදිරිපත් කරන්නැයි ශ්‍රේෂ්ඨාධිකරණය අද (08) නීතිපතිවරයාට නියෝග කළේය.

වත්මන් අමාත්‍ය මණ්ඩලය පත් කර ඇති ආකාරය නීති විරෝධී යැයි තීන්දු කොට එහි ක්‍රියාකාරීත්වය අත්හිටුවීමේ තහනම් නියෝගයක් නිකුත් කරන ලෙසට ඉල්ලමින් ගොනු කර ඇති පෙත්සම ඊයේ  කැඳවූ අවස්ථාවේදී ශ්‍රේෂ්ඨාධිකරණය  මෙම නියෝගය ලබා දෙන ලදී.

පෙත්සම විජිත් මළල්ගොඩ, යසන්ත කෝදාගොඩ සහ මහින්ද සමයවර්ධන යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල හමුවේ කැඳවනු ලැබීය.

එහිදී මෑතකදී පත් කරන ලද ඇතැම් අමාත්‍ය ධුර අහෝසි වී ඇති බවට තමන්ට තොරතුරු දැනගන්නට ලැබී ඇති අතර ඒ සම්බන්ධයෙන් වාර්තාවක් ඉදිරිපත් කිරීම සඳහා කාලය ලබා දෙන ලෙසට නීතිපතිවරයා වෙනුවෙන් පෙනී සිටි සොලිස්ටර් ජෙනරාල් ඉන්දිකා දේවමුනි ද සිල්වා මහත්මිය අධිකරණයෙන් ඉල්ලා සිටියාය.

ඒ අනුව අදාළ නියෝගය ලබාදුන් අධිකරණය අදාළ පෙත්සම කරුණු තහවුරු කිරීම සදහා ජනවාරි මස 27 වනදා කැඳවීමට නියම කෙරිණි.

මෙරට ආණ්ඩුක්‍රම ව්‍යවස්ථාව මගින්  අනුමත  කර ඇති  සංඛ්‍යාව ඉක්මවා යමින් වත්මන් අමාත්‍ය මණ්ඩලය පත්කිරීම  නීතිවිරෝධී බව ට තීරණය කරන ලෙස ඉල්ලා වෘත්තිකයින්ගේ ජාතික පෙරමුණේ ලේකම් ඉංජිනේරු කපිල රේණුක පෙරේරා මහතා මෙම පෙත්සම ගොනු කළේය.

පෙත්සමෙහි  වගඋත්තරකරුවන් ලෙස ජනාධිපති ගෝඨාභය රාජපක්ෂ මහතා වෙනුවෙන් නීතිපතිවරයා, අග්‍රාමාත්‍ය මහින්ද රාජපක්ෂ මහතා ඇතුළු අමාත්‍ය මණ්ඩල සාමාජිකයින්, සියලුම රාජ්‍ය අමාත්‍යවරු, ජනාධිපති ලේකම්වරයා, මුදල් අමාත්‍යාංශ ලේකම් ඇතුළු 82 දෙනෙකු නම්කර තිබේ.

වත්මන් ආණ්ඩුක්‍රම ව්‍යවස්ථාව අනුව පත් කල හැකි කැබිනට් ඇමැති ධුර  සංඛ්‍යාව 30ක්  සහ රාජ්‍ය ඇමැති ධුර සංඛ්‍යාව 40ක් බව පෙත්සමෙහි සදහන් වේ.

බැසිල් රාජපක්ෂ මහතා  මුදල් ඇමැති වරයා ලෙස ද , නාමල්  රාජපක්ෂ මහතා  සංවර්ධන කටයුතු පිළිබඳ අධීක්ෂණ ඇමැති වරයා ලෙස ද පත් වීම නිසා මේවන විට   කැබිනට්  ඇමැති ධුර 32ක් පවතින බව පෙත්සමෙහි සදහන් වේ. එසේම චමල් රාජපක්ෂ,  නාමල්  රාජපක්ෂ, දිලුම්  අමුණුගම,  සුදර්ශනී ප්‍රනාන්දු පුල්ලේ යන
අය රාජ්‍ය ඇමැති වරු ලෙස  පත් වීම නිසා රාජ්‍ය ඇමැති වරු 44ක් සිටින  බවද එමගින්  පෙන්වා දී ඇත. 

එය ව්‍යවස්ථාව මගින් පනවා ඇති සීමාවන් ඉක්මවා කැබිනට් අමාත්‍යවරු දෙදෙනෙකු සහ රාජ්‍ය අමාත්‍යවරුන් 4 දෙනෙකු ජනාධිපතිවරයා විසින් වැඩිපුර පත් කිරීමක් බවට
චෝදනා කරන පෙත්සම්කරු එම පත්කිරීම් ආණ්ඩුක්‍රම ව්‍යවස්ථාවට පටහැනි බවට චෝදනා කර සිටී. 

ඒ අනුව  එම ඇමැති  ධුර  පත් කල ඉකුත් ජුනි මස 07 වැනිදායින් පසුව මෙරට අමාත්‍ය මණ්ඩලයේ ක්‍රියාකාරීත්වය මුළුමනින්ම ව්‍යවස්ථාවට පටහැනි බව ඔහු පෙන්වා දෙයි

 ජනාධිපතිවරයා විසින් වත්මන් අමාත්‍ය මණ්ඩලය හා රාජ්‍ය අමාත්‍යවරු පත් කර තිබෙන ආකාරය ආණ්ඩුක්‍රම ව්‍යවස්ථාවේ 47 (1) (අ) සහ (ආ) ව්‍යවස්ථාවට පටහැනි බවත්,එමගින්  මෙරට ජනතාවගේ මූලික අයිතිවාසිකම් උල්ලංඝනය වන බව ට ප්‍රකාශයක් කරන ලෙස පෙත්සම්කරු අධිකරණයෙන් ඉල්ලා සිටී.

එබැවින්  එම ඇමැති වරු අදාළ  ඇමැති ධුර වල කටයුතු  කිරීම  අත්හිටුවන නියෝගයක් නිකුත් කරන ලෙස ද පෙත්සම් මගින් ඉල්ලා ඇත.

අමාත්‍ය  මණ්ඩලයේ   ක්‍රියාකාරීත්වය අත්හිටුවීමේ තහනම් නියෝගයක් නිකුත් කරන ලෙස පෙත්සම මගින්  ඉල්ලා  ඇත.

නීතිඥ දර්ශන වේරදූවගේ මහතා සමඟ නීතීඥ ඩිලාන්  මනම්පේරි මහතා  පෙත්සම් කරුවන් වෙනුවෙන් පෙනී සිටියහ.

නීතිපතිවරයා හා අමාත්‍ය මණ්ඩලය  වෙනුවෙන් අති⁣රේක සොලිසිටර් ජෙනරාල් ඉන්දිකා දේමුනි ද සිල්වා මහත්මිය පෙනී සිටියාය.