ඉන්දීයාවේ උත්තර ප්‍රදේශ්, උත්තරකාන්ද්, මනිපූර්, ගෝව සහ පන්ජාබ් ප්‍රාන්තවල මැතිවරණ ඡන්ද ගණන් කිරීම සහ ප්‍රතිඵල නිකුත් කිරීම අද (10) සිදුවිය.

උත්තර ප්‍රදේශ්, උත්තරකාන්ද්, මනිපූර්, ගෝව යන ප්‍රාන්ත බලය අත්පත් කර ගැනීමට අග්‍රාමාත්‍ය නරේන්ද්‍ර මෝදිගේ හින්දු ජාතිකවාදී ‘භාරතීය ජනතා පක්ෂය’ සමත් වූ අතර, පන්ජාබ් ප්‍රාන්තයේ ජය හිමිකර ගැනීමට සමත් වූයේ ඉන්දීය දේශපාලනයේ පෙරැළි කරන දූෂණ වංචා විරෝධී පක්ෂයක් ලෙස ද සැලකෙන ‘ආම් ආද්මී’ හෙවත් ‘පොදු මිනිසා’ පක්ෂයයි.

ප්‍රාන්ත මැතිවරණ කටයුතු ආරම්භ වූයේ පෙබරවාරි 14 වැනිදා සිටය. පළමුවෙන් පැවැත්වූයේ ගෝව ප්‍රාන්ත මැතිවරණයයි. ආසන 40 කින් සමන්විත ගෝව ප්‍රාන්තයේ බලය ‘භාරතීය ජනතා පක්ෂය’ සතුව පැවැති අතර, මෙවර මැතිවරණයේ දී ඔවුන්ට ඉන්දියාවේ ප්‍රධාන විපක්ෂ දේශපාලන කණ්ඩායම වන කොංග්‍රස් පක්ෂය පුමුඛ ඉන්දීය ජාතික කොංග්‍රස් පක්ෂ සන්ධානයෙන් අභියෝගයක් එල්ල විය.

මැතිවරණ ප්‍රතිඵල අනුව පෙනී ගියේ තියුණු සටනකින් පසු කොංග්‍රස් පක්ෂය අභිබවා යමින් ජයග්‍රහණය තහවුරු කර ගැනීමට භාරතීය ජනතා පක්ෂය සමත් වූ බවය. භාරතීය ජනතා පක්ෂය ආසන 17 ක් ද කොංග්‍රස් පක්ෂය ආසන 12 ක් ද දිනා ගත් බව මැතිවරණ ප්‍රතිඵලවලින් පෙනී  ගියේය.

පසුගිය පෙබරවාරි 28 වැනිදා සිට මාර්තු 5 තෙක් පැවැති මනිපූර් මැතිවරණයේ ප්‍රතිඵල ඉන්දීයාවේ උත්තර ප්‍රදේශ්, උත්තරකාන්ද්, මනිපූර්, ගෝව සහ පන්ජාබ් ප්‍රාන්තවල මැතිවරණ ඡන්ද ගණන් කිරීම සහ ප්‍රතිඵල නිකුත් කිරීම සිදුවිය. 

ප්‍රතිඵල නිකුත් වෙද්දී, ‘ජාතික ජනතා පක්ෂය’ සහ ‘නාග ජනතා පෙරමුණ’ පරාජය කරමින් ආසන 27 ක් දිනා ගෙන ඉදිරියට පැමිණියේ භාරතීය ජනතා පක්ෂයයි. මනිපූර් ප්‍රාන්ත සභාවේ ආසන ගණන 60 කි.

පන්ජාබ් ප්‍රාන්තයේ බලය ඉන්දීය ජාතික කොංග්‍රස් පක්ෂය සතුව පැවැතිණි. කොංග්‍රස් පක්ෂයෙන් බලය උදුරා ගැනීමට ‘ආම් ආද්මී’ පක්ෂය සමත් වීම සුවිශේෂී සිදුවීමකි. 2015 වසරේ සිට ඉන්දියාවේ නවදිල්ලි අගනුවර ද අයත් දිල්ලි ප්‍රාන්තයේ බලය අත්පත් කරගෙන සිටින්නේ ද දිල්ලි මහ ඇමැති ලෙස කටයුතු කරන අරවින්ද් කෙජ්රිවාල්ගේ  ‘ආම් ආද්මී’ පක්ෂයයි.

පන්ජාබ් ප්‍රාන්තයේ ආසන 117 ක් ඇති අතර, ‘ආම් ආද්මී’ පක්ෂය ආසන 90 ක් දිනා ගැනීමට සමත් විය. පාලක පක්ෂය වූ කොංග්‍රසයට දිනා ගැනීමට හැකි වූයේ ආසන 15 ක් පමණි.

උත්තර ප්‍රදේශ් යනු ඉන්දියාවේ වැඩිම ජනගහනයක් වෙසෙන ප්‍රාන්තයයි. ප්‍රාන්ත මහ ඇමැති ලෙස කටයුතු කරන්නේ දැඩි හින්දු ජාතිකවාදියකු මෙන්ම යෝගීවරයකු ද වන යෝගී ආධිත්‍යනාත්ය.

උත්තර ප්‍රදේශ් ප්‍රාන්තයේ මැතිවරණය ආරම්භ වූයේ පෙබරවාරි 10 වැනිදාය. එය අදියර කීපයක් යටතේ පැවැත්විණි. මැතිවරණ පැවැත්වූයේ 14, 20, 23, 27 සහ මාර්තු 3 සහ 7 දිනවලය.

උත්තර ප්‍රදේශ් ප්‍රාන්ත සභාවේ ආසන 403 කි. මීට වසර පහකට පෙර, පැවැති ප්‍රාන්ත මැතිවරණයේ දී භාරතීය ජනතා පක්ෂය ආසන 300 ක් දිනා ගැනීමට සමත් විය. කෙසේ නමුත් මෙවර ඔවුන්ට ජයග්‍රහණය කිරීමට හැකිවූයේ ආසන 273 කි. එය ද බහුතරය ඉක්මවා යෑමකි.

ඉන්දියාවේ මහ මැතිවරණ දෙකක් ඉතාමත් විශිෂ්ට ලෙස ජයග්‍රහණය කළ මෝදි, හින්දු ජාතිකවාදී භාරතීය ජනතා පක්ෂයට මෙහෙයවමින් යළි මහ මැතිවරණයකට මුහුණ දෙනු ඇත්තේ 2024 වසරේ දීය. උත්තර ප්‍රදේශ් ප්‍රාන්තයේ බලය දිගටම තහවුරු කර ගැනීමට භාරතීය ජනතා පක්ෂය සමත් වීම, අග්‍රාමාත්‍ය මෝදිට විශාල වාසියක් යැයි දේශපාලන විශ්ලේෂකයෝ පෙන්වා දෙති.

උත්තරකාන්ද් ප්‍රදේශ් ප්‍රාන්ත මැතිවරණය පැවැත්වූයේ පසුගිය පෙබරවාරි 14 වැනිදාය. උත්තරකාන්ද් පක්ෂය ආසන 70 කින් සමන්විතය. භාරතීය ජනතා පක්ෂය ආසන 44 ක් ජයග්‍රහණය කළේය. කොංග්‍රස් පක්ෂයට ජයග්‍රහණය කිරීමට හැකි වූයේ ආසන 22 කි. බහුතරය සඳහා ආසන 36 ක් දිනා ගැනීම කළ යුතුව තිබුණි.

මෙම 2022 වසර අවසානයේ ඉන්දියාවේ තවත් ප්‍රධාන ප්‍රාන්ත තුනක ප්‍රාන්ත සභා මැතිවරණ පැවැත්වීමට නියමිතය. එම ප්‍රාන්ත වන්නේ හිමාචල්, ගුජරාඨය සහ ජම්මු කාශ්මීරයයි. හිමාචල් සහ ගුජරාඨය භාරතීය ජනතා පක්ෂය යටතේ පවතී. ගුජරාඨය යනු ඉන්දීය අග්‍රාමාත්‍ය නරේන්ද්‍ර මෝදි උපන් ප්‍රාන්තයයි. බොහෝ දෙනාගේ අවධානය යොමු වනු ඇතැයි පැවැසෙන්නේ ජම්මු කාශ්මීර ප්‍රාන්ත මැතිවරණය කෙරෙහිය. ජම්මු කාශ්මීර මැතිවරණය පැවැත්වෙනු ඇත්තේ දෙසැම්බරයේය.

(එන්.ඩී.ටීවී.)