(ශාන්ත ප්‍රදීප් කුමාර කුලරත්න)

ත්‍රීරෝද රථයක යමින් කොළඹ අවට සුපිරි වෙළඳසැල්වල විදුලි ජනන යන්ත්‍රය වල සවිකර තිබූ බැටරි සොරා ගැනීමට පුරුදුව සිටි පෞද්ගලික බස්රථ කොන්දොස්තරවරයකු  අද  (17) දා අත්අඩංගුවට ගත් බව කොළඹ දකුණ කොට්ඨාස අපරාධ විමර්ශන කාර්යාංශය පවසයි .

ඒ සමග සෝරාගත් බවට සැක කෙරෙන රුපියල් ලක්ෂ හයකට ආසන්න බැටරි 10 සොරකම සඳහා භාවිතා කළ ත්‍රීරෝද රථය පොලිස් භාරයට ගෙන තිබේ.

කොළඹ අවට සුපිරි වෙළඳසැල් වල විදුලි ජනන යන්ත්‍ර වල සවිකර තිබූ  බැටරි සොරා ගැනීමේ ජාවාරමක් පිළිබඳව  පොලිස් ස්ථාන කිහිපයකට පැමිණිලි ලැබී තිබූ අතර ඒ පිළිබඳව අදාළ පොලිස් ස්ථාන හරහා විමර්ශන  සිදු කරමින් සිටියදී කොළඹ දකුණ කොට්ඨාස භාර ජ්‍යෙෂ්ඨ පොලිස් අධිකාරි හසන්ත මාරපන මහතාගේ උපදෙස් මත කොට්ඨාස අපරාධ විමර්ශන කාර්යාංශය මගින් තවත් විමර්ශනයක් ආරම්භ කෙරිණි.

ඒ අනුව  සොරකම් සිදු වූ ස්ථානවල ආරක්ෂිත කැමරා  පරික්ෂා කොට ඉන් අනාවරණය කරගත් තොරතුරකට අනුව   මාදිවෙල ප්‍රදේශයේ කුලී නිවසක රැඳී සිටි පුද්ගලයකු අත්අඩංගුවට ගෙන පරීක්ෂා කිරීමේදී එහි තිබී සොරාගත් බවට සැක කෙරන ඇම්පියර් 120 බැටරි 06 සහ සොරකම සඳහා භාවිතා කළ ත්‍රීරෝද රථය පොලිස් භාරයට ගෙන තිබේ

පසුව සැකකරුගෙන් දිගින් දිගටම ප්‍රශ්න කිරීමේදී  සොරාගත් බවට සැකකෙරන තවත්  බැටරි 4  සැකකරුගේ මිතුරෙකුගේ  ගරාජයක තිබී සොයා ගත් බව පොලිසිය පවසයි.

ඒ අතර ඇම්පියර් 120 බැටරි 08  ද ඇම්පියර් 90 බැටරි 02 ද , වූ බවත් ඒවායේ වටිනාකම රුපියල් ලක්ෂ හයකට ආසන්න බවත් පැවසේ .

සැකකරු මොරටුව පිටකොටුව  මාර්ගයේ පෞද්ගලික  බස් රථ වල කොන්දොස්තරවරයෙකු ලෙස  සේවය කරන අතර කොල්ලුපිටිය , කොහුවල , බම්බලපිටිය , මීගමුව සහ මහබාගේ පොලිස් වසම් වලින් මෙසේ බැටරි සොරාගෙන ඇති බවට තොරතුරු අනාවරණය වී තිබේ .