(සුජිත් හේවාජුලිගේ )

කාබනික පොහොර නිෂ්පාදනයට අවශ්‍ය යන්ත්‍ර සූත්‍ර ආනයනය කරන ලෙසත්  මෙරටදී නිපද විය හැකි යන්ත්‍ර සූත්‍ර වේ නම් ඒවා  රජයේ කර්මාන්ත ශාලාව හා යුද හමුදා ඉංජිනේරු බලකාය මාර්ගයෙන් නිෂ්පාදනය කර ගන්නා ලෙසත් ජනාධිපති ගෝඨාභය රාජපක්ෂ මහතා නිලධාරීන්ට උපදෙස් දුන්නේය.

මහ කන්නයට  අවශ්‍ය කාබනික පොහොර නිෂ්පාදනය කඩිනම්  කිරීමට වැඩපිළිවෙළක් යොදන ලෙසද ජනාධිපතිවරයා  මෙහිදී දැනුම් දුන්නේය.

ජනාධිපතිවරයා මෙසේ දැනුම් දුන්නේ කාබනික පොහොර නිෂ්පාදනය සම්බන්ධයෙන් කෘෂිකර්ම අමාත්‍යාංශය ඇතුළු රේඛීය රාජ්‍ය අමාත්‍යාංශවල ලේකම්වරුන්  හා නිලධාරීන්  සමග පැවති ඊයේ (2 ) පෙරවරුවේ පැවති සාකච්ඡාවකදීය.

පොහොර නිෂ්පාදනය පළාත් පාලන ආයතන මට්ටමින් සිදු කිරීම කෙරෙහි ජනපතිවරයාගේ අවධානය මෙහිදී යොමු විය .

එම පළාත් පාලන ආයතන වලට තාක්ෂණික දැනුම ලබා දීමේ අවශ්‍යතාවයද ජනාධිපති ගෝඨාභය රාජපක්ෂ මහතා මෙහිදී පෙන්වා දුන්නේය.

කාබනික පොහොර නිෂ්පාදනයට අවශ්‍ය අමුද්‍රව්‍ය ග්‍රාමීය පරිසරයෙන්ම සපයා ගන්නා ලෙසත් ඊට සමෘද්ධිලාභීන් දායක කර ගැනීමෙන් අලුත් ග්‍රාමීය ආර්ථිකයක් ගොඩනඟා ගත හැකි බවත් ජනාධිපතිවරයා මෙහිදී පැවැසීය.

ගොවියාට හිඟයකින් තොරව කාබනික පොහොර ලබාදීම අනිවාර්ය බවද රාජපක්ෂ මහතා කීය .

කාබනික පොහොර සම්පූර්ණ ප්‍රමාණය මෙරට දී නිෂ්පාදනය කිරීමට අපේක්ෂා කරන බවත් යම් අඩුවක් සිදු වුවහොත් රජය මගින් ගෙන්වා ගබඩා කර තබා ගන්නා බවත් කෘෂිකර්ම අමාත්‍ය මහින්දානන්ද අලුත්ගමගේ මහතා පැවසීය.

පස පරික්ෂා කිරීමෙන් පසු ගොවීන්ට අවශ්‍ය කාබනික පෝර නිකුත් කරන බවත්පස පරික්ෂා කිරීම සඳහා අවශ්‍ය උපකරණ දිවයිනේ සියලුම ගොවිජන සේවා මධ්‍යස්ථාන වෙත ලබාදීමට පියවර ගන්නා බවත් ඇමැතිවරයා කීය.

කාබනික පොහොර නිෂ්පාදනය සඳහා ගොවියාට අවශ්‍ය තාක්ෂණික දැනුම ලබා ලබාදීමට කටයුතු කරන බව රාජ්‍ය අමාත්‍ය ශෂීන්ද්‍ර රාජපක්ෂ මහතා මෙහිදී පැවසීය.

කාබනික පොහොර භාවිතය සම්බන්ධයෙන්ගොවීන් දැනුවත් කිරීම සඳහා මුද්‍රිත උපදෙස් මාලාවක් ලබා දීමට ද මෙහිදී තීරණය විය.

පසු පරික්ෂා කිරීමේ උපකරණ ගොවිජන සේවා කොමසාරිස් ජනරාල්වරයාට සහ කෘෂිකර්ම අධ්‍යක්ෂ ජනරාල්වරයාට නිල වශයෙන් භාර දීමද ජනාධිපතිවරයා අතින් මෙහිදී සිදුවිය .

මෙම සාකච්ඡාවට රාජ්‍ය අමාත්‍ය මොහාන් ද සිල්වා, ජනාධිපති ලේකම් පී බී ජයසුන්දර මුදල් අමාත්‍යාංශ ලේකම්  ලේකම් එස් ආර් ආටිගල යන මහත්වරු ද  කෘෂිකර්ම අමාත්‍යාංශය හා රේඛීය රාජ්‍ය අමාත්‍යාංශවල ලේකම්වරු හා නිලධාරීහු පිරිසක්ද සහභාගී වූහ .