(යොහාන් භාසුර)

සියලූ ජාතික සහ ජාත්‍යන්තර සාධක සැළැකිල්ලට ගෙන ශ්‍රී ලංකාවේ කොමියුනිස්ට් පක්ෂය සියලු අධිරාජ්‍ය විරෝධී දේශප්‍රේමී, ප්‍රගතිශීලි වාමගාමී, බලවේගවලට නව දේශපාලන පෙළගැස්මකට අවධානය යොමු කරන ලෙස ඉල්ලා සිටින බව එම පක්‍ෂයේ ප්‍රධාන ලේකම් වෛද්‍ය ජී. වීරසිංහ මහතා නිවේදනයක් නිකුත් කරමින් පවසයි.

ඉදිරි මැතිවරණවලට මුහුණ දීම සඳහා නව දේශපාලන පෙළගැස්ම අනිවාර්යයෙන්ම අධිරාජ්‍ය විරෝධී සහ දේශප්‍රේමී එකක් වියයුතු බවත් නව ගෝලීය දේශපාලන අභියෝග හමුවේ නව නිදහස් රටවල ස්වෛරීත්වය රැකගැනීමේ අනිවාර්ය අවශ්‍යතාව ඉස්මතු වී ඇති බවත් වීරසිංහ මහතා කීය.

එම අවශ්‍යතාව සාක්ෂාත් කරගත හැකිවන්නේ “මැද - වම” සන්ධානයකට වන අතර ඒ සඳහා අවශ්‍ය වන්නා වු සහ අදාළවන්නා වු ජාත්‍යන්තර පරිසරයක් ද නිර්මාණය වෙමින් තිබෙන බව ද කී වීරසිංහ මහතා අවම පොදු වැඩපිළිවෙළක් මත පිහිටා ආර්ථිකය ගොඩනැගීමේ ජාතික කාර්යභාරය උදෙසා අධිරාජ්‍ය විරෝධී ප්‍රගතිශීලි, වාම හා දේශප්‍රේමී බලවේගයන්ගේ පුළුල් දේශපාලන සන්ධානයක අවශ්‍යතාව ශ්‍රී ලංකාවේ කොමියුනිස්ට් පක්ෂය අවධාරණයෙන් ප්‍රකාශ කරන බව ද සඳහන් කළේය.

ශ්‍රී ලංකාවේ කොමියුනිස්ට් පක්ෂයේ දේශපාලන මණ්ඩලය වත්මන් ජාතික හා ගෝලීය දේශපාලන වර්ධනයන් සහ ප්‍රවනතා පිළිබඳව ගැඹුරින් සාකච්ඡා කළ බවත් රට මුහුණදෙන්නා වු ගැඹුරු, ප්‍රබල හා තීරණාත්මක ආර්ථික අර්බුදය මෙන්ම රටේ ස්වෛරීත්වයට බලපා ඇති භූදේශපාලනික අභියෝගයන් ද එහි දී සැළැකිල්ලට ගත් බවත් එම පක්‍ෂයේ ප්‍රධාන ලේකම් වෛද්‍ය ජී. වීරසිංහ මහතා සඳහන් කළේය.