(ඩයනා උදයංගනී)

අලුත් අවුරුදු සමයෙන් පසු මෙරට කොරෝනා ආසාදිතයින් සංඛ්‍යාව ඉහළයාම සම්බන්ධයෙන් ජනතාව අනියත බියක් ඇතිකරගත යුතු නැති බවත්, එම තත්ත්වය පාලනය කිරීම සඳහා සියලු ක්‍රියාමාර්ග ගන්නා බවත් සම කැබිනට් ප්‍රකාශක, වැවිලි අමාත්‍ය, වෛද්‍ය රමේෂ් පතිරණ මහතා පවසයි.

රජය හා සෞඛ්‍ය අංශ මේ ගැන දැඩි විමසිල්ලෙන් පසුවෙමින් ගත යුතු සෑම පියවරක්ම ගනිමින් සිටින බව ද ඇමතිවරයා සඳහන් කළේය.

එබැවින් මෙම තත්ත්වය වර්ධනයවීමට නොදී වළක්වාගත හැකිවේ යැයි බලාපොරොත්තු වන බව ද කැබිනට් ප්‍රකාශකවරයා කීවේය.

අමාත්‍ය රමේෂ් පතිරණ මහතා මේ බව පැවසුවේ රජයේ ප්‍රවෘත්ති දෙපාර්තමේන්තුවේ දී අද (20) පැවති කැබිනට් තීරණ දැනුම්දීමේ මාධ්‍ය හමුව අමතමිනි.

අලුත් අවුරුද්දට පෙරත් සෞඛ්‍ය අංශ හා කොරෝනා මර්දන කාර්ය සාධක බලකායත් මේ ගැන අනතුරු ඇඟවීම් කර තිබූ බව කී ඇමතිවරයා අවුරුදු සමයේ ඇතැම් ස්ථානවල සෞඛ්‍ය උපදෙස් කඩවූ බව ද සඳහන් කළේය.

මෙරට කොවිඩ් පළමු හා දෙවැනි රැල්ල මනාව පාලනය කරගත් සෞඛ්‍ය අංශයන්ට මෙම තත්ත්වය ද පාලනය කරගැනීමට හැකිවනු ඇතැයි රමේෂ් පතිරණ මහතා කීවේය.

රෝගය වැඩි වශයෙන් පැතිරුණු ගම්පහ කොළඹ දිස්ත්‍රික්කවල මිලියනයක් පමණ මේ වන විට එන්නත්කරණයට ලක්කර තිබෙනවා. පැතිරීයාමේ අවදානම අඩු කර තිබෙන බවද හෙතෙම පැවසීය.

එන්නත් පළමු මාත්‍රාව ලබාදුන් අයට දෙවැනි මාත්‍රාව ලබාදීම සඳහා අවශ්‍ය එන්නත් ප්‍රමාණය තිබෙන නිසා ඒ ගැන බියවිය යුතු නැතැයි ද ඇමතිවරයා කීවේය.