(බිමල් ශ්‍යාමන් ජයසිංහ සහ ගයාන් සුරියආරච්චි )

මඩකලපුව වාකරේ පුදුර් කදිරවේලි ප්‍රදේශයේ පිහිටි ඉඩමකදී පිරිසක් සමඟ ඇතිවූ ආරවුලක දි ලංකා ඛනිජ තෙල්  නීතිගත සංස්ථාවේ උසස් නිලධාරියකු වෙඩි තැබීමක් සිදුකර ඇතැයි පොලිස් මූලස්ථානය සඳහන් කරයි.

වෙඩි තැබීමෙන් කිසිවකුටත් තුවාල සිදුවී නැත.

වෙඩි තැබීමට යොදාගෙන තිබූ පිස්තෝල ගිනි අවිය සහ ජීව උණ්ඩ දහයක් අඩංගු පතුරුම් ගැබ වාකරේ පොලිසිය මගින්  භාරයට ගෙන ඇත.

එම නිලධාරියා ඔහුගේ බිරිඳ සමඟ ඊයේ  (17) ඔහුට අයත් ජීප් රථයෙන් වාකරේ පොලිස් වසමේ පුදුර් කදිර වේලි පිහිටි අක්කර 11ක වපරිසයකින් යුත් ඔවුන්ට අයත් ඉඩමට සංවර්ධන කටයුත්තක් සඳහා  පැමිණ ඇතැයි පොලිසිය කියයි.

එහිදී බැකෝ යන්ත්‍රයක් යොදා මාර්ගය පිළිසකර කරමින් සිටියදී එම ස්ථානයට පැමිණ තිබූ පුද්ගලයන් කීප දෙනෙකු වාකරේ ප්‍රාදේශීය ලේකම්වරයා විසින් තමන්ට වගා කිරීම සඳහා බලපත්‍ර මත ඉඩම් කොටස් ලබා දී ඇති බවත් මාර්ගය පිළිසකර කිරීම වහාම නතර කරන ලෙසත් පවසා විරෝධය දක්වා ඇතැයි පොලිසිය කියයි. එහිදී පැමිණි පිරිස බැකෝ යන්ත්‍ර  රියදුරුට  පහරදී  බැකෝ යන්ත්‍රයේ පැති වීදුරුවක්ද කඩා බිඳ දමා ඇත.

එම අවස්ථාවේදී සභාපතිවරයා විසින් රියදුරට පහරදීම වළක්වා ගැනීම සඳහා ඔහුට රජයෙන් නිකුත් කර ඇති පිස්තෝල ගිනිඅවියෙන්  බිමට පහත් කර වෙඩිල්ලක් තබා ඇති අතර එම අවස්ථාවේදී එහි සිටි පිරිස කලහකාරි  තත්ත්වයෙන් වැළකී එම ස්ථානයෙන් පලා ගොස් ඇතැයි පොලිසිය කියයි.

මේ සම්බන්ධයෙන් ඛනිජ තෙල් නීතිගත සංස්ථාවේ උසස් නිලධාරියා විසින් වාකරේ පොලිසිය වෙත පැමිණිලි කර ඇති අතර ඔහුට නිකුත් කර තිබූ ඒ බි 40739 අංක දරණ බලපත්‍රයේ සහිත පිස්තෝලය හා  උණ්ඩ  දහය සහ පතුරුම් ගැබ නඩු භාණ්ඩ ලෙස පොලිස් භාරයට ගෙන ඇත.