( තිලකරත්න දිසානායක)

ගජමුතු දෙකක් අලෙවි කිරීමට සූදානමින් සිටි බව කියන පුද්ගලයින් පස් දෙනෙකු සහ  විකිණිමට සූදානම්කර තිබු ගජමුතු සිය බාරයට ගැනීමට ගම්පහ කොට්ඨාස දූෂණ විමර්ශන අංශයේ නිලධාරීන් සමත්ව ඇත. 

රුපියල් ලක්ෂ 38 කට මෙම ගජමුතු අලෙවි කිරීමට සූදානම් කර තිබූ බවට තොරතුරු ලැබී ඇතැයි පොලීසිය කියයි.

ගජමුතු දෙකක් අලෙවි කිරීමේ සූදානමක් පවතින බවට ගම්පහ කොට්ඨාස දූෂණ විමර්ශන අංශයට ලද තොරතුරක් මත එම අංශයේ නිලධාරීන් විසින් සිදු කරන ලද පරීක්ෂාවක් මත ගම්පහ  - පැරණි මිනුවන්ගොඩ මාර්ගයේ විහාරස්ථානය අසලදී සැකකරුවන් පස් දෙනා අත් අඩංගුවට ගනු ලැබූ බව පොලීසිය පවසයි. 

මොවුන් මහව , ගම්පහ සහ අරනායක යන ප්‍රදේශවල පදිංචි අවුරුදු 35 - 45 අතර වයසේ පසුවන්නන් බවද පොලීසිය කියයි. 

ගැනුම්කරු පැමිණෙන තෙක් විහාරස්ථානය අසල සැකකරුවන් රැඳී සිටි බව මොවුන්ගෙන් ප්‍රශ්ණ කිරීමේදී අනාවරණය වී ඇත. සැකකරුවන් ගම්පහ මහේස්ත්‍රාත් අධිකරණය වෙත ඉදිරිපත් කිරීමට නියමිතය.