(රන්ජන් කස්තුරි)

ලන්ඩන් නුවර කිංග්ස්බරි ශ්‍රී සද්ධාතිස්ස ජාත්‍යන්තර බෞද්ධ මධ්‍යස්ථානාධිපති එක්සත් රාජධානියේ ප්‍රධාන සංඝ නායක අග්ගමහා පණ්ඩිත ගලයායේ පියදස්සී නාහිමියෝ  පසුගිය 19 වන දින අපවත් වුහ.

1947 වසරේ ජුනි මස 28 වැනිදා කුරුණෑගල දිස්ත්‍රික්කයේ පන්නල ගලයාය ග්‍රාමයේ උපත ලැබූ උන්වහන්සේගේ ගිහි නාමය වුයේ අඹේකෝන් මුදියන්සේලාගේ සුරවීරය. සඳලංකාව ශාස්ත්‍රෝදය පිරිවෙනින්මූලික අධ්‍යාපනය ලබා විද්‍යෝදය මහ පිරිවෙනින් මෙන්ම කැලණිය විශ්වවිද්‍යාලයෙන් ශාස්ත්‍රපති උපාධිය හිමිකර ගත්තේය. උන්වහන්සේ පැවිදි දිවියට පිවිසෙන්නේ 1970 වසරේදීයි.

1984 දී ලන්ඩන් බෞද්ධ විහාරාධිපතිව වැඩසිටි මහාචාර්ය පුජ්‍ය හම්මලව ශ්‍රී සද්ධාතිස්ස නාහිමියන්ගේ ආරාධනයෙන් පියදස්සී හිමියන් ධර්ම ප්‍රචාරක කටයුතු සඳහා ලන්ඩන් නුවරට වැඩම කළහ. 1989දී උන්වහන්සේ සද්ධාතිස්ස හිමියනුගේ මග පෙන්වීම යටතේ ජාත්‍යන්තර බෞද්ධ මධ්‍යස්ථානය නමින් උතුරු ලන්ඩනයේ කෙන්ටන් ප්‍රදේශයේ විහාරස්ථානයක් ආරම්භ කළේය.

සද්ධාතිස්ස නාහිමියන්ගේ අපවත්වීමෙන් පසුව පියදස්සි හිමියන් තමන් වහන්සේගේ ගුරු හිමියන් වූ සද්ධාතිස්ස නාහිමියන්ට කරන ගෞරවයක් වශයෙන් එම විහාරස්ථානය "ශ්‍රී සද්ධාතිස්ස ජාත්‍යන්තර බෞද්ධ මධ්‍යස්ථානය" නමින් නම් කරනු ලැබිය. පසුව එම විහාරස්ථානය අද පවත්වාගෙන යනු ලබන කිංග්ස්බරි නඟරයේ වඩාත් ඉඩ පහසු සහිත ගොඩනැඟිල්ලකට ගෙනයනු ලැබිය.

පියදස්සි හිමියන්පූ පිළිබඳව සටහනක් තබන ලන්ඩන් නුවර ප්‍රවීන මාධ්‍යවේදී නීතිඥ ශාන්ති සේනාධීර මහතා මෙලෙස ලියා තිබුණි "පුජ්‍ය ගලයායේ පියදස්සී ස්වාමීන් වහන්සේගේ ධර්ම ප්‍රචාරක සහ සමාජ ආගමික සේවය අගයමින් මහාවිහාරවංශික ශ්‍යාමෝපාලී මහා නිකායේ මල්වතු මහාවිහාර පාර්ශවයෙන් එක්සත් රාජධානියේ ප්‍රධාන අධිකරන සංඝනායක පදවියෙන්ද අස්ගිරි මහාවිහාර පාර්ශවයෙන් එක්සත් රාජධානියේ ප්‍රධාන සංඝනායක පදවියෙන්ද, බ්‍රෙන්ට් නගර සභාව විශිෂ්ට පුරවැසි නාමයෙන්ද බ්‍රිතාන්‍යයේ දෙවන එළිසබෙත් රැජින MBE ගෞරව නාමයෙන්ද, බුරුම රජය අග්ග මහා පණ්ඩිත ගෞරව නාමයද පුදකර සිටි බව උන් වහන්සේගේ 75 වෙනි ජනම දින පැවැත්වූ උළෙලේ දී සඳහන් කර තිබුණි.

තවද උන්වහන්සේ ශ්‍රී ලංකාවේ ඉටුකළ සමාජ සේවා කටයුතු අතර හෙට්ටිපොළ ගල්කන්ද මුදිත ළමා නිවාසය අරඹා උසාවි තීන්දු මඟින් අනාතවූ, අත්හල, අසරණ, දරුවන් යහමගට ගැනීමේ වැඩපිළිවෙලක්ද ආරම්භ කිරීම,එහි ඉන්නා දරුවන්ට අධ්‍යාපන පහසුකම් සහ නේවාසික පහසුකම් සැළසීමද, සුනාමි ව්‍යසනයෙන් අසරණවූ ජනතාව උදෙසා ගාල්ල වලහන්දූව ප්‍රදේශයේ සුනාමි ගම්මානයක් ඉදිකිරිම, නාවල ශ්‍රී සද්ධාතිස්ස ජාත්‍යන්තර පුස්කාලයක් ඉදිකිරීම ප්‍රධාන වේ.

වසර ගණනාවක් තිස්සේ ලන්ඩනයේ අවුරුදු උළෙල අප සංස්කෘතිය විදෙස් රටකදී මෙහි හැදී වැදුණු දු දරුවනට පේනවා දී අති සාර්ථක අන්දමින් පැවැත්වීමේ ගෞරවය උන්වහන්සේට හිමිවේ.කින්ස්බරි විහාරස්ථානයේ පැවැත්වූ දහම් පාසල තුලින් එංගලන්තයේ වෙසෙන දුදරුවන්ගේ දහම් දැනුම ඔපවත් කිරීමේ මහගු කාර්යද ,වරින්වර ජාත්‍යන්තර බෞද්ධ සම්මේලන පැවැත්වීම ඇතුළු බුදු දහම මෙරට ප්‍රචාරය කිරීම සඳහා මහගු මෙහෙයක් පසු ගිය දශක ගණනාවක් තිස්සේ ඉටු කිරීමේ ගෞරවයද උන් වහන්සේගෙන් ඉටු විය.

උන්වහන්සේ කලක් තිස්සේ ගිලන්ව වැඩ විසු අතර එනමුදු සිය යුතුකම් නොපිරිහෙලාම ඉටුකළ යතිවරයකු ලෙස සඳහන් කල යුතුය. අපවත් වන විට උන් වහන්සේ 75 වැනි වියෙහි පසුවිය. පූජ්‍ය ගලයායේ පියදස්සි නායක ස්වාමින් වහන්සේ විසින් එක්සත් රාජධානිය තුළ සිදුකරනුලැබූ මේ සමාජ මෙහෙවර අප සිත් තුළ චිරාත් කාලයක් පවතිනු නියතය, අපි උන්වහන්සේට අතිඋතුම් අජරාමර මහා නිවන් සම්පත්තිය ලැබේවායි ප්‍රාර්ථනා කරමු."

පියදස්සි හිමියන්ගේ ශ්‍රී දේහය අද (29)  සද්ධාතිස්ස ජාත්‍යන්තර බෞද්ධ මධ්‍යස්ථානය වෙත වැඩම කරවනු ලැබිය. 30වෙනි සිකුරාදා සවස ආගමික වතාවත් සිදුකිරීමට නියමිතය. අනිද්දා (31) වෙනි සෙනසුරාද උදේ 9.45 ට ශ්‍රී දේහය විහාරස්ථානයෙන් සිට හෙන්ඩන් ආදාහනාගාරය වෙත වැඩමකරවා අවසන් කටයුතු සිදු කෙරෙනු ඇත.