(මනෝප්‍රිය ගුණසේකර)

මහ බැංකු බැදුම්කර වංචා කළ බවට චෝදනා ලැබ සිටින පර්පචුවල් ටෙසරීන් සමාගමේ  සභාපති ජෙෆ්රි ඇලෝසියස් මහතාට පනවා ඇති විදේශ ගමන් තහනම තාවකාලිකව ඉවත් කළ කොළඹ ත්‍රිපුද්ගල මහාධිකරණ විනිසුරු මඩුල්ල ඔහුට මාස 03 ක කාලයක් තුළ විදේශ ගත වීමට අවසර දුන්නේය.

වෛද්‍ය ප්‍රතිකාර ගැනීම සඳහා ඇලෝසියස් මහතාට සිංගප්පූරුවට යෑමට අවසර දෙන ලෙස ඔහුගේ නීතිඥ්ඥවරයා කළ ඉල්ලීමක් පිළිගනිමින් විනිසුරු මඩුල්ල එලෙස අවසර දුන්නේය.

මහාධිකරණ විනිසුරුවරුන් වන අමල් පෙරේරා, නාමල් බලල්ලේ සහ ආදිත්‍ය පටබැදිගේ යන මහත්වරුන්ගෙන් සැදුම්ලත් ත්‍රිපුද්ගල මහාධිකරණ විනිසුරු මඩුල්ල හමුවේ මෙම නඩුව කැඳවිණි.

ඇලෝසියස් මහතාට ප්‍රතිකාර ගැනීමට විදේශ ගත වීම සඳහා අවසර දෙන්නැයි ඔහුගේ නීතිඥ්ඥවරයා කළ ඉල්ලීමට අවසර දුන් විනිසුරු මඩුල්ල විත්තිකරුට පනවා තිබූ විදේශ ගමන් තහනම තාවකාලිකව ඉවත් කර ඇති බව ආගමන හා විගමන පාලනාධීකාරියට දැනුම් දීමටද නියම කළේය.