(ගයාන් සූරිය ආරච්චි)

ශ්‍රී ලංකා පොදුජන පෙරමුණේ හිටපු පාර්ලිමේන්තු මන්ත්‍රී ජොන්ස්ටන් ප්‍රනාන්දු පසුගිය රජයෙන් ගිනි අවි 8ක් ලබාගෙන ඇති බව ආරක්ෂක අමාත්‍යාංශ ආරංචි මාර්ග පවසයි.

ඒ් අනුව ඔහු සතුව AF 408 – 9mm cz 75, AHIBT 219 – 9mm Glock, ESM 893 – 9mm Glock, 24SLG2-0002 – 12Bore Repeter, 24SLG2-0151 – 12 Bore Repeter, 24SLG2-0010 – 12 Bore Repeter, 7000482/240888 – 12 Bore Repeter, 15333989 – 12 Bore Repeter යන ගිනි අවි 8 ක් ආරක්ෂක අමාත්‍යාංශය විසින් නිකුත් කර තිබුණි.

මීට අමතරව, ඇවන්ගාඩ් නැමැති සමුද්‍ර ආරක්ෂක ආයතනයක් පවත්වාගෙන ගිය නිශ්ශංක සේනාධිපතිද ද පසුගිය රජයන්ගෙන් ගිනි අවි 9ක් ලබාගෙන ඇති බව එම ආරංචි මාර්ග කියයි.

පිස්තෝල 7ක් (මි.මි 9) සහ බෝර රිපීටර් 2ක් එම ගිනි අවි අතර වෙයි.

ස්වයං ආරක්ෂාව සඳහා පුරවැසියන්ට නිකුත් කර ඇති සියලූම ගිනිඅවි සහ උණ්ඩ නැවත ලබාගැනීමට ආරක්ෂක අමාත්‍යාංශය පෙරේදා (04) තීරණය කර තිබුණා.

ඒ අනුව ගිනි අවි සහ ඒ සඳහා නිකුත්කර ඇති පතරොම්ද ශ්‍රී ලංකා නාවික හමුදාවේ වැලිසර පිහිටි රජයේ වාණිජ පුපුරණ ද්‍රව්‍ය ගබඩාව වෙත නොවැම්බර්  07 දිනට පෙර භාරදෙන ලෙස සියළුම බලපත්‍රලාභීන් හට දැනුම් දී තිබුණි.

පසුගිය රජය විසින් ගිනි අවි ලබාදුන් පුද්ගලයන් අතර හිටපු ජනාධිපති මහින්ද රාජපක්ෂ පුත් යෝෂිත රාජපක්ෂද වෙයි. ඔහු වෙත නිකුත් කර ඇති ගිනි අවි ප‍්‍රමාණය 07 කි.