(රෝෂන් තුෂාර)

උපයා ගත් ආකාරය හෙළිකළ නොහැකි රුපියල් කෝටි දහසයකට අධික වත්කම් සන්තකයේ තබා ගැනීම සම්බන්ධයෙන් මුදල් විසුද්ද කරන පනත යටතේ අත්අඩංගුවට ගත් හෙරොයින් ජාවාරම්කාරයෙකු යැයි ප්‍රකට දෙමටගොඩ චමින්දගේ සොහොයුරා වූ දෙමටගෝඩ රුවන්ගේ  ,පුත්‍රයා, බිරිඳ සහ,සහෝදරිය ලබන 08 දින දක්වා රක්ෂිත බන්ධනාගාර ගත කිරීමට කොළඹ ප්‍රධාන මහේස්ත්‍රාත් ප්‍රසන්න අල්විස් මහතා නියෝග කළේය.

මෙලෙස රක්ෂිත බන්ධනාගාර ගත වූයේ සිරිනාථ පතිරණගේ තරිඳු මදුශංක,ජෝන් පීටර්ලාගේ ශානිකා ලක්මිණී සහ සිරිනාථ පතිරනලාගේ සමන්තී නිර්මලා යන සැකකරුවන්ය.

අපරාධ පරීක්ෂණ දෙපාර්තමේන්තුවේ නීති විරෝධී වත්කම් විමර්ශන කොට්ඨාසය මගින් සැකකරුවන් අත්අඩංගුවට ගෙන ඇති අතර පැමිණිල්ල වෙනුවෙන් නියෝජ්‍ය සොලිසිටර් ජනරාල් සුදර්ශන ද සිල්වා මහතා ඉදිරිපත් කළ කරුණු සලකා බැලීමෙන් පසුව මෙසේ රක්ෂිත බන්ධනාගාර ගත කෙරිණි.

මුදල් විසුද්ධිකරණයට ආධාර අනුබල දීම සම්බන්ධයෙන් සැකකරුවන්ට අත්අඩංගුවට පත් වූ බව පැවසූ නියෝජ්‍ය සොලිසිටර් ජනරාල්වරයා සැකකාර පුත්‍රයා සන්තකයේ රුපියල් මිලියන 86ක දේපළක් ඇති බවත් ඊට අමතරව ස්ථාවර තැන්පතු, රත්තරන් යන දේපළවලට  හිමිකාරීත්වය ඇති බවට කරුණු අනාවරණය කරගෙන ඇති බවත් රුවන්ගේ බිරිඳ බිරිඳ සන්තකයේ රුපියල් මිලියන  82ක වත්කම් ඇති බවත් සහෝදරිය වූ විත්තිකාරිය මත්ද්‍රව්‍ය බලපත්‍ර සහිත රෙස්ට්ටුරන්ට් එකක අධ්‍යක්ෂකවරියක් බවත් සඳහන් කළේය.

සැකකරුවන්ට ඇප ලබා දුනහොත් විමර්ශන වලට බාධා විය හැකි බැවින් සැකකරුවන්  රක්ෂිත බන්ධනාගාර ගත කරන ලෙසට ද ඉල්ලා සිටියේය.

සැකකරුවන්ට එරෙහිව මුදල් විසුද්ද කරන පනත යටතේ ලබන සතිය ඇතුළට මහාධිකරණය ඉදිරියේ අධිචෝදනා ගොනු කරන බවද සඳහන් කළේය.

දෙපාර්ශවයේ කරුණු සලකා බැලූ මහේස්ත්‍රාත්වරයා විමර්ශන වලට හා සාක්ෂිකරුවන්ට බලපෑම් එල්ල විය හැකි බවට ඉදිරිපත් වූ කරුණු අනුව සැකකරුවන් රක්ෂිත බන්ධනා කර ගාර ගත කරන බවට නියෝග කළේය.