(අංජුල මහික වීරරත්න)

යල කන්නයේ වී වගාව අවසන් කළ අම්පාර, මඩකලපුව, මුලතිව්, යාපනය, අනුරාධපුර,හා මොණරාගලට මහ කන්නය සඳහා අවශ්‍ය යුරියා පොහොර කඩිනමින් එහි යැවීමට පියවර ගන්නා ලෙස   කෘෂිකර්ම, වනජීවී හා වනසම්පත් සංවර්ධන අමාත්‍ය මහින්ද අමරවීර මහතා අද  (20) අමාත්‍යාංශයේ නිලධාරීන්ට උපදෙස් දුන්නේය.

එම දිස්ත්‍රික්කවල මහ කන්නය සඳහා වී වගා කටයුතු බොහෝ විට ඔක්තෝබර් මස මුල් සති  දෙකේ ආරම්භ කිරීමට නියමිතය. එම නිසා ගොවි ජනතාවට වගාව සඳහා අවශ්‍ය පොහොර ඒ වනවිටත් ගොවිජන මධ්‍යස්ථානවලට ලබා දීම මගින් ඔවුන්ට පහසුවෙන් යුරියා පොහොර මිල දී ගැනීමට අවස්ථාව සැලසීම අරමුණ බව කෘෂිකර්ම අමාත්‍යාංශය කියයි.

මහ කන්නයේ යුරියා  පොහොර ලබා දීමේ දී යල කන්නයේ මෙන් රුපියල් 10,000ක මුදලකට ලබා දීමට පියවර ගන්නා ලෙස කෘෂිකර්ම අමාත්‍ය මහින්ද අමරවීර මහතා කළ ඉල්ලීම පරිදි  ජනාධිපති රනිල් වික්‍රමසිංහ මහතා විසින් මහ කන්නයේ දී ද රුපියල් 10,000ක මුදලකට කිලෝග්‍රෑම් 50ක බරින් යුත් පොහොර මිටියක් ලබා දීමට කටයුතු යොදා තිබෙන බව කෘෂිකර්ම අමාත්‍යාංශය පවසයි.