(ජී.ඒ.පී කුමාර)

ඇගළුම් ආයතනයක් වසා දමන ලෙස ඉල්ලා නොච්චියාගම ගම්වාසීහු පිරිසක්  අද (02) ඇගළුම් ආයතනය ඉදිරිපිට විරෝධතාවයක නිරත වුහ.

ඇගළුම් ආයතනය ආසන්නයේ නිවසක කාන්තාවක් කොවිඩ් ආසාදනය වී ඊයේ  (01) මියයාමත් සමගම 27 හංදිය ශ්‍රී විසුද්ධාරාමාධිපති  අනුරාධපුර විජිතානන්ද හිමි ඇතුළු පිරිස මෙම විරෝධාතාවයට එක්ව සිටියහ.

 ඇගළුම් ආයතනයේ ‍ඇතුල් වීමේ දොරටු අවහිර වන සේ  සිටගනිමින් පිරිස  විරෝධතාවයෙහි නිරත වු අතර ඇගළුම් ආයතනය වෙත බස් රථ සහ වැන් රථවලින් පැමිණි සේවක සේවිකාවන් හට  වාහන තුලින් පිටතට පැමිණීමට ඉඩ නොදී එම වාහන නැවත හරවා යැවීමට විරෝධතා කරුවන් මෙහිදී කටයුතු කලහ.

මේ වන විට ඇගළුම් ආයතනයේ සේවක සේවිකාවන් විශාල පිරිසකට කොවිඩ් 19 රෝගය වැළදී ඇති අතර ඔවුන් සහ ඔවුන්ගේ නිවෙස් තුල විශාල පිරිසක් නිරෝධායනය වන බවත් තව දුරටත් ඇගළුම් ආයතය පවත්වාගෙන යාම හේතුවෙන් මෙම රෝගය ව්‍යාප්ත වන බවටද ඔවුහුචෝදනා කරති.

එමෙන්ම නිරෝධායනයට ලක් කර ඇති සේවක සේවිකාවන් නිරෝධායන කාල සීමාව අවසන් වීමට ප්‍රථම සේවයට කැදවා ගන්නා බවටද පිරිස චෝදනා කලහ.

මේ හේතුව තුල දින 14 කාලයක් සදහා ඇගළුම් ආයතනය වසා දමා සියළු සේවක පිරිස  පරීක්ෂණ කටයුතු සදහා යොමුකර නිසි සෞඛ්‍ය උපදෙස් වලට අනුකූලව ආයතනය පවත්වාගන යාමට කටයුතු කරණ ලෙස විරෝධතාකරුවෝ පාලන අධිකාරියෙන් ඉල්ලා සිටියහ