(සුජිත් හේවාජුලිගේ)

නුවරඑළිය දිස්ත්‍රික්කයේ තැපැල් ඡන්ද මධ්‍යස්ථාන  ආසන්නයේ සංවිධාන කෙරුණු  රැස්වීම් හයක්  අත්හිටවූ බව  නුවරඑළිය තේරීම් බාර  නිලධාරි  නන්දන ගලබඩ මහතා පැවසීය.

වලපනේ ප්‍රදේශයේ තැපැල් ඡන්ද මධ්‍යස්ථානයක් ආසන්නයේ පැවැත්වීමට සූදානම් කෙරුණු රැස්වීමක්ද ඊයේ අත්හිටවූ බව ඔහු සඳහන් කළේය.

ඡන්ද මධ්‍යස්ථාන ආසනයේ රැස්වීම් පැවැත්වීම මැතිවරණ නීතිය අනුව  තහනම් වේ.

නුවරඑළිය දිස්ත්‍රික්කයේ තැපැල් ඡන්ද මධ්‍යස්ථාන දෙසීයක් පමණ ක්‍රියාත්මක විය.

ඡන්දය ප්‍රකාශ වීම සම්බන්ධයෙන් අප කළ විමසුමකදී අදහස් දැක්වූ නන්දන ගලබඩ මහතා පැවසුවේ ඡන්දදායකයන්ගෙන් සියයට අනූවකට වැඩි පිරිසක්  ඡන්දය භාවිතා කළ බවයි.

ඡන්ද විමසීම කෙරුණු කාලයේදී සුළු සුළු සිද්ධීන් හැරුණු කළ  බරපතල සිදුවීම් කිසිවක් වාර්තාවී නැතැයිද  ඔහු ප්‍රකාශ කළේය.

මේ අතර නුවරඑළිය දිස්ත්‍රික්කයේ නීති විරෝධී මැතිවරණ කාර්යාල  සහ  මැතිවරණ ප්‍රචාරක කටයුතු  සම්බන්ධයෙන් විමසිල්ලෙන් සිට ඒවා නතර කිරීමට පියවර ගන්නැයි  තේරීම්බාර නිලධාරීවරයා පොලිසියට උපදෙස්දී ඇත.

එසේම ප්‍රචාරක කටයුතු සදහා පෙළපාළි  සහ  ලොකු කණ්ඩායම් වශයෙන්  ගෙන් ගෙට යාමද නතර කරන ලෙස හෙතෙම  උපදෙස්දී ඇත.