(යොහාන් භාසුර සහ ගයාන් සූරියාරච්චි)

නීති විරෝධී ලෙස මුහුදු මාර්ගයෙන් ප්‍රංශයට අයත් රී-යූනියන් දූපත වෙත සංක්‍රමණය වීමට උත්සාහ කිරීමේදී අත්අඩංගුවට පත්වූ ශ්‍රී ලාංකිකයන් 14 දෙනෙකු ගුවන් මඟින් මෙරටට පිටුවහල් කර ඇති බව ශ්‍රී ලංකා නාවික හමුදාව පවසයි.

බහුදින ධීවර යාත්‍රාවලින් පසුගිය දෙසැම්බර් මස 07 වන දින සංක්‍රමණය වු පුද්ගලයින් 7 ක්, 2022 වසරේ අගෝස්තු මස 22 වැනි දින සංක්‍රමණය වු පුද්ගලයින් දෙදෙනෙක්, 2018 වසරේ සංක්‍රමණය වු පුද්ගලයින් තිදෙනෙක් සහ 2019 වර්ෂයේ ඉන්දුනීසියාවේ සිට සංක්‍රමණය වු පුද්ගලයින් දෙදෙනෙක් ඇතුළුව පුද්ගලයින් 14 දෙනෙකු මෙලෙස ගුවන් මගින් මෙරටට පිටුවහල් කිරීමට කටයුතු කර ඇති බවද නාවික හමුදාව කීය.

මෙම ශ්‍රී ලාංකිකයන් පිරිස බේරුවල, හලාවත සහ කලවංචිකුඩි යන ප්‍රදේශයන්හී පදිංචි වයස අවුරුදු 21 ත් 60 ත් අතර වයසේ පසුවන පුද්ගලයන් බවට අනාවරණය වී ඇති අතර මෙම අනවසර සංක්‍රමණිකයන් සම්බන්ධ ඉදිරි නීතිමය කටයුතු ආගමන විගමන දෙපාර්තමේන්තුව සහ ශ්‍රී ලංකා පොලීසිය පරීක්ෂණ පවත්වන බවත් මෙවැනි අනවසර සංක්‍රමණිකයන් රී-යූනියන් දූපත වෙත ඇතුළු කරගැනීම සඳහා ප්‍රංශ රජයෙන් කිසිදු අනුග්‍රහයක් හිමි නොවන බවත් නාවික හමුදාව සඳහන් කළේය.

එවැනි නීති විරෝධී සංක්‍රමණිකයන් අත්අඩංගුවට ගෙන වහාම නැවතත් මෙරටට පිටුවහල් කරනු ලබන බැවින්, මිනිස් ජාවාරම්කරුවන් මුහුදු මාර්ගයෙන් සංවිධානය කරන අනවසර සංක්‍රමණ සඳහා සහභාගී වීම හෝ අනුබලදීමෙන් වලකින ලෙස ජනතාවගෙන් ඉල්ලා සිටින බවත් ශ්‍රී ලංකා නාවික හමුදාව වැඩිදුරටත් පැවසීය.