(අංජුල මහික වීරරත්න)

 ශ්‍රී ලංකා පොලිසියේ අතරමඟ නතර වී තිබූ ඉදිකිරීම් ව්‍යාපෘතිවල ඉතිරි වැඩ නිම කිරීමට කැබිනට් අනුමැතිය ලැබී තිබේ.

ශ්‍රී ලංකා පොලීසිය සඳහා අවශ්‍ය යටිතල පහසුකම් ලබා දීමේ අරමුණින් ඉදිකිරීම් ව්‍යාපෘති ගණනාවක් ක්‍රියාත්මක කිරීම ආරම්භ කර ඇතත් 2020 වර්ෂයේදී කොවිඩ් - 19 වසංගත තත්ත්වය ව්‍යාප්ත වීම සහ රටේ ඇති වූ ආර්ථික අර්බුදය හේතුවෙන් 2021 - 2023 වසර වලදී වැඩ නිම කිරීමට සැලසුම් කර තිබූ ව්‍යාපෘති අපේක්ෂිත පරිදි අවසන් කිරීමට නොහැකි වී තිබෙන බව රජය පවසයි.

කොළඹ 2,කුමාරන් රත්නම් පාරේ පිහිටි කනිෂ්ඨ ශ්‍රේණියේ නිලධාරීන්ගේ විවාහක නිල නිවාස ඉදිකිරීමේ ව්‍යාපෘතිය,කටාන ජාතික පොලිස් අභ්‍යාස ආයතනයේ නේවාසික ගොඩනැගිල්ල ඉදිකිරීමේ ව්‍යාපෘතිය,කොල්ලුපිටිය පොලිස් ස්ථාන ගොඩනැගිල්ලේ ඉතිරි වැඩ නිම කිරීමේ ව්‍යාපෘතිය මෙලෙස අතරමග නතර වී ඇත.

එම ව්‍යාපෘතිවල ඉතිරි වැඩ නිම කිරීමට හැකි වන පරිදි ඒවායේ මුළු පිරිවැය ඇස්තමේන්තු සංශෝධනය කිරීමටත්, ව්‍යාපෘති අවසන් කිරීමේ කාල සීමාව 2024- 2027 දක්වා දීර්ඝ කිරීමටත් මහජන ආරක්ෂක අමාත්‍යවරයා  ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.