(නිමල් ජයරත්න)

මෙවර ජනාධිපතිවරණය සඳහා පොළොන්නරුව දිස්ත්‍රික්කයේ සවස 3.00 වනවිට  සියයට 65 ක් පමණ ඡන්දය ප්‍රකාශ කර  ඇති බව පොළොන්නරුව දිස්ත්‍රික් තේරීම් භාර නිලධාරී සුජන්ත ඒකනායක මහතා සඳහන් කළේය.

මෙවර ජනාධිපතිවරණය සඳහා පොළොන්නරුව දිස්ත්‍රික්කයේ පොළොන්නරුව, මින්නේරිය, මැදිරිගිරිය,යන ආසන තුනේ, ඡන්ද මධ්‍යස්ථාන 292 කදි, ඡන්ද දායකයන් තුන්ලක්‍ෂ පනස් එක්දාස් තුන්සිය දෙදෙනකු 3,51,302 ඡන්දය භාවිතා කිරීමට සුදුසුකම් ලබා තිබිණි.

මෙතෙක් ඡන්දය ප්‍රකාශ කරන කාලය තුළ දිස්ත්‍රික්කයේ කිසිදු ප්‍රචණ්ඩයක් ක්‍රියාවක් සිදු වී නොමැති බවත්, පොළොන්නරුව රාජකීය මධ්‍ය මහා විද්‍යාලයේදී ඡන්දය ගණන් කිරීමේ කටයුතු සිදුකරන බවත්, තැපැල් ඡන්ද ගණන් කිරීමේ කටයුතු සවස 4.15 ට පමණ ආරම්භ කිරීමට අවශ්‍ය කටයුතු සැලසුම් කර ඇති බවද ඒකනායක මහතා කීවේය.

ඡන්ද ගණන් කිරීමේදි තැපැල් ඡන්ද ගණන් කිරීමට ශාලා පහළොවක් සහ, සාමාන්‍ය ඡන්ද ගණන් කිරීමට ශාලා තිස්තුනක් සූදානම් කර තිබෙන බවද ඒකනායක මහතා වැඩිදුරටත් කීවේය.