(ශෂිකා අබේරත්න සහ මනිෂා වීරසිංහ)

වෙළෙඳපොළේ බිත්තර හිඟයක් පවතින බව පාරිභෝගිකයෝ පවසති.

බිත්තර සඳහා උපරිම මිලක් නියම කරමින් පාරිභෝගික සේවා අධිකාරිය විසින් නිකුත් කරනු ලැබූ ගැසට් පත්‍රයට අනුව, සුදු බිත්තරයක් සඳහා රුපියල් 44ක් ද, රතු බිත්තරයක් සඳහා රුපියල් 46ක් ද නියම කර ඇතත් වෙළෙඳ පොළේ බිත්තරයක් රුපියල් 50ත් 55ත් අතර මිලකට අලෙවි වන බව ද ඔවුහු කියති.

එහෙත් වැඩි මිල ගණන්වලට වුවද වෙළෙඳපොළේ බිත්තර නොමැති බව පාරිභෝගිකයෝ ප්‍රකාශ කරති.

මේ අතර, බිත්තර සඳහා නියම කරන ලද පාලන මිලට බිත්තර වෙඳාමෙන් තොග සහ සිල්ලර වෙළෙඳුන්ට ලාභ ලැබිය නොහැකි බැවින් හා ඔවුන් ගොවිපොළවලින් බිත්තර මිලදී නොගන්නා බැවින් බිත්තර හිඟයක් නිර්මාණය වී ඇති බව සමස්ත ලංකා කුකුළු නිෂ්පාදකයන්ගේ සංගමයේ සභාපති අජිත් ගුණසේකර මහතා පැවැසීය.

බිත්තර හිඟයට විසඳුම ලෙස බිත්තර ආනයනය කිරීමට රජය පියවර ගනිමින් සිටින අතර, ඒ හරහා දේශීය නිෂ්පාදකයන් අධෛර්යමත් වීම හා දේශීය අලෙවි ජාලය කඩා වැටෙන බවද ගුණසේකර මහතා පැවසීය.

මේ අතර, සමස්ත ලංකා ආපනශාලා හිමියන්ගේ සංගමයේ සභාපති අසේල සම්පත් මහතා සඳහන් කළේ බිත්තර ගැටලුවට විසඳුමක් කඩිනමින් ලබා නොදෙන්නේ නම්, ඉදිරි දින කිහිපය තුළ සියලුම හෝටල් වැසී යන බවය. මේ හේතුවෙන් කොත්තු, බිත්තර රොටී ආදී බේකරි නිෂ්පාදන කඩා වැටෙනු ඇති බවත් ඔවුහු කියා සිටිති.