(සමන් පාලිත නානායක්කාර) 

ලුණුගල විස්ස කණුව අසලින් අද (16)  විශාල පස් කන්දක් කඩා වැටී අවහිර වී තිබූ බදුල්ල මඩකලපුව ඒ 5 චෙංකලඩි මාර්ගය  පැයකට වඩා අඩු කාලයකින් යන්ත්‍රානුසාරයෙන් පස් ඉවත්කර  පිළිසකර කළ බව බදුල්ල ආපදා කළමනාකරණ මධ්‍යස්ථානය පැවසීය. 

 විදේශීය සංචාරකයින් මෙන්ම දීර්ඝ නිවාඩුවත් සමග පිට පළාත්වලින් පැමිණෙන දේශීය සංචාරකයින් ද මේ දිනවල   වැඩි  වශයෙන් මෙම මාර්ග භාවිතා කිරීමට පෙළඹීම නිසා  මාර්ගය කඩිනමින් පිළිසකර  කිරීමට අවශ්‍ය කටයුතු යෙදූ බවද බදුල්ල ආපදා කළමනාකරණ මධ්‍යස්ථානය පැවසීය.

මේ අතර  කොළඹ බදුල්ල මාර්ගයේ බණ්ඩාරවල බදුල්ල අතර  උඩුවර හතේකනුව ප්‍රදේශයේ දී ඉකුත් නවය දින නාය ගිය ස්ථානයේ මේ වන විට පස් ඉවත් කර ඇති බැවින් අද දවස තුළ එම ස්ථානයේ  අදාල සියලු අංශවල සහභාගිත්වෙයන් ස්ථානීය  පරීක්ෂණයක් කර මාර්ගය විවෘත කිරීමේ හැකියාව තීරණය කරන බවද බදුල්ල ආපදා කළමනාකරණ මධ්‍යස්ථානය පැවසීය.