(අංජුල මහික වීරරත්න)

බිම්බෝම්බ ඉවත් කිරීමේ කටයුතු අධීක්ෂණය හා මෙහෙයවීමේ කටයුතු වෙනුවෙන් බිම්බෝම්බ පිළිබඳ ක්‍රියාකාරී ජාතික මධ්‍යස්ථානය 2027 දක්වා පවත්වාගෙන යාමට කැබිනට් අනුමැතිය හිමි වී තිබේ. 

ඊට අදාල කැබිනට් පත්‍රිකාව නාගරික සංවර්ධන හා නිවාස අමාත්‍ය ප්‍රසන්න රණතුංග මහතාගේ අත්සනින් කැබිනට් මණ්ඩලයට ඉදිරිපත් කර තිබුණි.

2027 වසර වන විට ලංකාව බිම්බෝම්බ වලින් තොර රටක් කිරීමට මෙම එකඟතාවය පළ කර තිබෙන බවත් ඒ අනුව බිම්බෝම්බ ඉවත් කිරීමේ කාර්යයේ අඛන්ඩව නිරත රාජ්‍ය නොවන ආයතන සමඟ ගිවිසුම් අත්සන් කර ව්‍යාපෘතිය තවදුරටත් ක්‍රියාත්මක කිරීමට මෙහිදී අනුමැතිය හිමිවූ බවත් අමාත්‍ය ප්‍රසන්න රණතුංග මහතා කීය.

බිම්බෝම්බ ඉවත් කිරීමේ වැඩසටහන ක්‍රියාත්මක කිරීම සඳහා ව්‍යාපෘති කළමනාකරණ ඒකකයක් අවශ්‍ය නොවන බවත් වැඩසටහන 2027 දක්වා ක්‍රියාත්මක කිරීමට අවශ්‍ය නම් වාර්ෂිකව අමාත්‍ය මණ්ඩලය අනුමැතිය ලබා ගත යුතු බවත් අමාත්‍ය මණ්ඩල තීරණය මඟින් දැනුම් දී තිබේ.