(එස් ඩී කොඩිකාර සහ ඩී.ඒ.පතිරණ)

දෙනියාය අධ්‍යාපන කලාපයට අයත් පට්ටිගල පර්සි අබේවර්ධන මහා විද්‍යාලයේ සිසුන් සියයකට අධික ප්‍රමාණයකට හා අනධ්‍යයන කාර්ය මණ්ඩලයේ දෙදෙනකු අද (30) බඹර ප්‍රහාරයකට ලක්ව රෝහල්ගත කර ඇතැයි ඌරුබොක්ක පොලිසිය පවසයි.

බඹර ප්‍රහාරයට ලක් වූ සිසුන්ගෙන්  70ක් පමණ අද  (30) දහවල් වන විටත් හීගොඩ රජයේ රෝහලේ නේවාසිකව ප්‍රතිකාර ලබන අතර බරපතළ තත්වයේ පසුවූ තවත් සිසුන් 08 දෙනකු වැඩි දුර ප්‍රතිකාර සඳහා  ඇඹිලිපිටිය මහ රෝහලට මාරු කර යැවූ බවත් සෙසු සිසුන් ප්‍රතිකාර ලබා පිටව ගිය බවත්  රෝහල් ආරංචි මාර්ග පවසයි. 

පාසල ආසන්නයේ තිබූ ඉඩමක කිතුල් ගසක බැඳ තිබූ බඹර කූඩුවක් ඇවිස්සී ක්‍රීඩා පිටියේ සිටි සිසුන් දෙදෙනෙකුට පළමුව බඹරුන් දෂ්ට කර ඇති අතර ඔවුන් බේරාගැනීමට පැමිණි සෙසු  සිසුන් පිරිසට ඉන්පසුව බඹරුන් එලව එලවා දෂ්ට කර ඇති බව පැවසේ.

ඉන් පසු  දහවල් කාලයේ පළමු දෙවැනි ශ්‍රේණිවල සිසුන් රැගෙන යාමට පැමිණි  දෙමාපියන් පිරිසක්  ගිණි  මැල  ගසා බඹරුන් පලවා හැරීමට කටයුතු කර තිබූ අතර  බඹර ප්‍රහාරවලට ලක් නොවූ අනිකුත් සිසුන් ආරක්ෂිත ස්ථාන කරා  රැගෙන යාමට කටයුතු කළ බව විද්‍යාලයේ විදුහල්පති කේ.පියසිරි මහතා පැවසීය.

සිද්ධිය සම්බන්ධයෙන් ඌරුබොක්ක පොලීසිය වැඩි දුර පරීක්ෂණ පවත්වයි.