(නිමන්ති රණසිංහ)

කල් ඉකුත් වූ රුධිර පෙරන කට්ටල විනාශ කිරීමෙන් වැලකී සිට ‘දූෂණය‘ නම් වරදක් සිදුකළ බවට චෝදනා ලැබූ ජාතික ලේ දීමේ සේවයේ හිටපු අධ්‍යක්ෂිකා වෛද්‍ය මංගලිකා බින්දුසාර සහ රජයේ වෛද්‍ය චම්පා සුබෝදිනි මංචනායක මහත්මින්ට එරෙහිව පැවැති අල්ලස් නඩුවෙන් ඔවුන් දෙදෙනා නිදහස් කිරීමට කොළඹ ප්‍රධාන මහේස්ත්‍රාත් බුද්ධික සී. රාගල මහතා අද (07) නියෝග කළේය.

අපරාධ නඩුවිධාන සංග්‍රහ පනතේ 186 වගන්ති ප්‍රකාරව නැවත නඩු පැවරීමේ පදනම මත මෙම චූදිතයන් දෙදෙනා එම නඩුවෙන් නිදහස් කිරිමට අධිකරණය එලෙස නියම කළේය.

චුදිතයන් වෙනුවෙන් අධිකරණයේ පෙනී සිටි ජනාධිපති නිතීඥවරුන් වන ප්‍රසන්න ඩී. අල්විස් මහතා සහ ශවේන්ද්‍ර ප්‍රනාන්දු යන මහත්වරුන් අධිකරණයට දැනුම් දුන්නේ තම සේවාදායකයින්ට එරෙහිව අල්ලස් හෝ දූෂණ කොමිසම චෝදනා ගොනුකර ඇති ආකාරය අනුව එම නඩුව ඉදිරියට ගෙන යා නොහැකි බැවින් ඔවුන් නිදහස් කරන ලෙසය.

මෙහිදී අල්ලස් කොමිසම වෙනුවෙන් අධිකරණය හමුවේ පෙනී සිටි එහි නියෝජ්‍ය අධ්‍යක්ෂිකා ගංගා හෙයියන්තුඩුව මහත්මිය සදහන් කළේ කාර්ය පටිපාටියේ ඇති දෝෂයක් පදනම් කරගනිමින් නඩුවක් තවදුරටත් පවත්වාගෙන යා නොහැකි යන පදනම පිළිගත නොහැකි බවත්, අපරාධ නඩු විධාන සංග්‍රහ පනතේ ඊට අවශ්‍ය ප්‍රතිපාදන ඇතුළත්ව ඇති බවත්ය.

වර්ෂ 2008ක් වූ අප්‍රේල් මස 01 වන දින සිට ජුලි මස 09 වන දින දක්වා වූ කාලය තුළ  රජයේ සේවකයකු වූ ජාතික ලේ දීමේ සේවයේ අධ්‍යක්ෂවූ පළමුවැනි චූදිත සහ රජයේ වෛද්‍යවරියක වූ දෙවැනි චූදිත ගබඩාවේ ඉතිරිව තිබූ 2008. 03. 31 දිනට කාලය ඉකුත් වූ බැස්ටර් ආයතනයේ නිෂ්පාදිත ඊඑස් 3000 යන්ත්‍රයේ භාවිතයට ගන්නා තෙරපියුටික් ප්ලස්මා එක්ස්චේන්ජ් හා ඇම්කස් යන්ත්‍රයේ භාවිතයට ගනු ලබන ඒ පෙරසීස් කට්ටල ආණ්ඩුවට හෝ රෝගීන්ට හා රුධිර දායකයින්ට අයුතු සහගත ලෙස හෝ නීති විරෝධී ලෙස පාඩුවක් බව දැන දැනම විනාශ කිරීමෙන් වැලකී සිටීමෙන් “දූෂණය” නම් වරදක් සිදුකළැයි අල්ලස් කොමිසම චූදිතයන්ට එරෙහිව චෝදනා 03ක් යටතේ නඩු පවරා තිබුණේ ඉකුත් 2016 වසරේ මාර්තු මස 09 වැනිදාය.