(රෝෂන් තුෂාර)

හෙරොයින් කිලෝ විසි දෙකක් අත් අඩංගුවට ගැනීමේ පොලිස් මෙහෙයුමේදී වෙඩි වැදී මියගිය පාතාල කල්ලි සාමාජිකයකු යැයි කියන මාකඳුරේ මදුෂ්ගේ මරණය සම්බන්ධයෙන් සිදුකරන විමර්ශන රහස් පොලිසියට පවරන්නැයි ඔහුගේ (මදුෂ්ගේ) බිරිඳ කළ ඉල්ලීම කොළඹ අතිරේක මහේස්ත්‍රාත් මංජුල රත්නාක මහතා අද (07) ප්‍රතික්ෂේප කළේය.

මලිගාවත්ත පොලිසියේ විමර්ශන සම්බන්ධයෙන් සෑහීමකට පත් නොවන්නේ නම් පොලිස්පතිවරයාට, බස්නාහිර පළාත් භාර ජ්‍යෙෂ්ඨ පොලිස් පතිවරයාට හෝ රහස් පොලිසියට පැමිණිල්ලක් ඉදිරිපත් කළ හැකි බව පෙන්වා දුන් අතිරේක මහේස්ත්‍රාත්වරයා අධිකරණ සේවා කොමිසමේ චක්‍රලේඛ ප්‍රකාරව විමර්ශන රහස් පොලිසිය වෙත යොමු කිරීමට මහේස්ත්‍රාත්වරයාට හැකියාවක් නොමැති බව පෙන්වා දුන්නේය.

මදුෂ් නැමති මරණකරුගේ පච්චාත් මරණ පරීක්ෂණ විමර්ශනය සිදුකර තීන්දුවක් ලබා දී ඇති බව පෙන්වා දුන් මහේස්ත්‍රාත්වරයා අධිකරණය ලබා දී ඇති තීන්දුව ප්‍රකාරව ඉදිරි විමර්ශන ප්‍රගතිය දෙසැම්බර් මස 05 වැනි දින අධිකරණයට ඉදිරිපත් කරන ලෙසට මාලිගාවත්ත පොලිසියට නියෝග කළේය.

මාකඳුරේ මදුස්ගේ බිරිඳ වන මාකඳුරේ ගයානි මුතුමාලි වෙනුවෙන් ඉදිරිපත් කළ මෝෂමක් සලකා බැලීමෙන් පසුව මෙම නියෝග නිකුත් කෙරිණි.