(ෂේන් සෙනෙවිරත්න)

පොල්ගොල්ල ජලාශයේ වසර දෙකකට වරක් සිදු කරන නඩත්තු කටයුත්තක් සඳහා මේ මස 27 වැනිදා සිට ජලාශය හිස් කිරීමට මහවැලි අධිකාරිය සැලසුම් කොට ඇති අතර ඒ හේතුවෙන් මහනුවර අවට ප්‍රදේශ ගණනාවකට ජල සැපයුම අත්හිටවනු ලබන බවද එම අධිකාරිය කියයි .

ඒ අනුව මහනුවර මහ නගර සභා බල ප්‍රදේශය, පාතදුම්බර, පූජාපිටිය, හාරිස්පත්තුව, අකුරණ ජල සම්පාදන ක්‍රමයට අයත් ප්‍රදේශවලටද කුණ්ඩසාලය ප්‍රාදේශීය ලේකම් කොට්ඨාශයට අයත් රජවැල්ල, සිරිමල්වත්ත, අම්පිටිය, අමුණුගම, හන්තාන සහ වළල යන ප්‍රදේශ හා විසල් මහනුවර ජල පවිත්‍රාගාරය මගින් ජලය බෙදා හරින මාවතගම ප්‍රදේශවලට ජල සැපයුම අත්හිටුවීමට සිදුවන බව මහවැලි අධිකාරිය කියයි .

පොල්ගොල්ල ජලාශය 27 දින මධ්‍යම රාත්‍රියේ සිට ජලය හිස් කිරීම ආරම්භ කරන අතර ලබන සෙනසුරාදා (28) සිට සඳුදා (30) දින දක්වා පැය 65 ක කාලයක් ජල සැපයුම අත්හිටවනු ඇති බවද මහවැලි අධිකාරිය කියයි .

රජරට කෘෂිකාර්මික කටයුතු මේ දිනවල අවසන්ව තිබීමත් වියලි කාලගුණික තත්ත්වයක් පැවතීමත් හේතුවෙන් මෙම දිනවල පොල්ගොල්ල ජලාශයේ නඩත්තු කටයුතු සිදු කිරීම මෙම දින කිහිපය යොදාගත් බවද මහවැලි අධිකාරිය පැවසීය .

ජලාශය හිස්වීමත් සමඟ එහි මාලු ඇල්ලීමට හෝ ක්‍රීඩා කිරීමට එහි රොන්මඩ තට්ටුවලට නොබසින ලෙසද ජනතාවට මහවැලි අධිකාරිය අනතුරු අඟවා සිටී