( තිළිණි ද සිල්වා සහ රංජන් කටුගම්පොළ )

හිටපු මුදල් රාජ්‍ය  ඇමැති  අජිත් නිවාඩ් කබ්රාල් මහතා ශ්‍රී ලංකා මහ බැංකුවේ අධිපති වරයා ලෙස පත් කිරීමට  එරෙහිව  හිටපු ආණ්ඩුකාර රජිත කීර්ති තෙන්නකෝන් මහතා විසින් ගොනු කර ඇති රිට් පෙත්සම විභාගයට නොගෙනම ඉවත දැමීමට අභියාචනාධිකරණය අද(03) තීන්දු කළේය.

මෙම පෙත්සම කිසිදු  නීතිමය පදනමක් නැතිව ඉදිරිපත් කර ඇති බැවින්  එය විභාගයට නොගෙනම නිෂ්ප්‍රභ කරන්නැයි  නීතිපතිවරයා   ඉදිරිපත් කළ විරෝධතාවය පිළිගනිමින් අධිකරණය මෙම තීන්දුව ලබා දෙන ලදී.

 සෝභිත රාජකරුණා සහ ධම්මික ගනේපොල යන  මහත්වරුන් ගෙන් සමන්විත අභියාචනාධිකරණ විනිසුරු මඩුල්ල විසින් මෙම නියෝගය ලබා දන ලදී.

අධිකරණය හමුවේ සිය මූලික විරෝධතා ඉදිරිපත් කරමින් අතිරේක සොලිසිටර් ජෙනරාල් නෙරින් පුල්ලේ මහතා කියා සිටියේ මෙම  පත්කිරීම ජනාධිපතිවරයා විසින් සිදුකර ඇති බැවින් ඊට එරෙහිව ගොනු කල මෙම පෙත්සම විභාගකිරීමට අභියාචනාධිකරණය ට අධිකරණ බලයක් නොමැති  බවත් ,පෙත්සම්කරු විසින් ඉදිරිපත් කර තිබෙන පෙත්සම තුළ අසත්‍ය සහ නොමග යවන සුළු තොරතුරු රැසක් ඇතුළත් කර ඇතැයිද   අතිරේක සොලිසිටර් ජනරාල්වරයා සඳහන් කළේය.  

දකුණු පළාත් හිටපු ආණ්ඩුකාර වරයෙකු වන රජිත කීර්ති තෙන්නකෝන් මහතා ගොනු කළ මෙම පෙත්සමේ  වගඋත්තරකරුවන් ලෙස නීතිපතිවරයා, පොලිස්පතිවරයා, හිටපු අමාත්‍ය අජිත් නිවාඩ් කබ්රාල්, ජනාධිපති ලේකම් වරයා, මුදල් අමාත්‍ය බැසිල් රාජපක්ෂ, ශ්‍රී ලංකා මහ බැංකුවේ නියෝජ්‍ය අධිපති ටී.එම්.ජේ. වයි.පී. ප්‍රනාන්දු යන අය නම් කර සිටිති.

මහ බැංකු බැඳුම්කර වංචාව පිළිබඳව සොයා බැලූ ජනාධිපති කොමිසම විසින් ඉදිරිපත් කළ නිර්දේශ මත ශ්‍රී ලංකා මහ බැංකුව විසින් වෝහාරික විගණනයක් සිදුකළ බවත් එම වෝහාරික විගණන වාර්තාවට අනුව වග උත්තරකාර අජිත් නිවාඩ් කබ්රාල් මහතා ශ්‍රී ලංකා මහ බැංකුවේ අධිපති වශයෙන් කටයුතු කළ 2005 සහ 2015 වසර දක්වා කාලසීමාව තුළ රජයට රුපියල් බිලියන 10.4 ත් 10.6 අතර පාඩුවක් සිදුවී ඇති බව වාර්තා ගත කර ඇති බව පෙත්සමෙහි සදහන් වේ.

එසේම  ඒ මහතා මූලිකත්වය දැරූ හෙජින් ගිවිසුම හරහා ද ශ්‍රී ලංකා රජයට ඇමරිකානු ඩොලර් මිලියන 200ක  පාඩුවක් සිදුවී ඇති බවද පෙත්සම්කරු සිය පෙත්සමෙන් පෙන්වා දී ඇත. ඔහු මහ බැංකු අධිපති ධූරයට නැවත පත් කිරිම මගින්, අපරාධමය වරදකට සම්බන්ධ මහ බැංකුවේ සතු සාක්ෂි විනාශ කිරීමට, වෙනස් කිරීමට හා සාක්ෂිකරුවන්ට බලපෑම් කිරීමට අවස්ථාවක් හිමිවන බව ද  පෙත්සමෙහි සදහන් වේ

අජිත් නිවාඩ් කබ්රාල් මහතා අධිපතිවරයා වශයෙන් කටයුතු කළ අවධියේ ශ්‍රී ලංකා මහ බැංකුවට සිදුවූ අලාභ ඇතුළත් වෝහාරික විගනන වාර්තාව එම බැංකුව විසින් නීතිපතිවරයා වෙත ඉදිරිපත් කර තිබුණද මේ දක්වා ඔහුට එරෙහිව නීතිමය  පියවර ගෙන නොමැති  බවට  පෙත්සම්කරු පෙන්වා දී තිබිණි.

එබැවින් ජනාධිපති විමර්ශන කොමිෂන් සභා නිර්දේශයක් මත සිදු කළ වෝහාරික විගණන වාර්තාවේ නිර්දේශ මගින් චෝදනා ලැබ සිටින  අජිත් නිවාඩ් කබ්රාල් මහතා අත්අඩංගු වට ගෙන රදවා තබා ප්‍රකාශ සටහන් කර ගන්නා ලෙස ද, ඔහුට  එරෙහිව   නීති මගින් කටයුතු කරන ලෙසට සහ නඩු  පැවරීමට පියවර ගන්නා ලෙසද පොලිස්පති වරයා,   නීතිපති වරයා   ට නියෝග කරන මැන්ඩාමුස් රිට් ආඥා  නිකුත් කරන ලෙස ද මෙම පෙත්සම මගින් වැඩි දුරටත් සදහන් කළේය.

එසේම   ශ්‍රී ලංකා මහ බැංකුවේ අධිපතිවරයා වශයෙන්  අජිත් නිවාඩ් කබ්රාල් මහතා පත් කරන ලෙස මුදල් අමාත්‍යවරයා විසින් යොමුකර තිබෙන නිර්දේශය බල රහිත කිරීමේ රිට් ආඥාවක් නිකුත් කරන ලෙස පෙත්සම්කරු  ඉල්ලා සිටියේය.

මෙම පෙත්සම විභාග කර අවසන් තීන්දුවක් ප්‍රකාශයට පත් කරන තුරු ඔහු ශ්‍රී ලංකා මහ බැංකුවේ අධිපතිවරයා ලෙස   ක්‍රියා කිරීම වැළැක්වීමේ අතුරු නියෝගයක් නිකුත් කරන ලෙසත් පෙත්සමෙන් වැඩිදුරටත් ඉල්ලා තිබිණි.