(ලුසිත ජයමාන්න)

පාර්ලිමේන්තු මහ මැතිවරණයේ නිරීක්ෂණ කටයුතු සඳහා ජාත්‍යන්තර මැතිවරණ නිරීක්ෂකයෝ 10 දෙනෙක්ගෙන් සමන්විත කණ්ඩායමක් මෙරටට පැමිණ සිටිති.

ශ්‍රී ලංකා මැතිවරණ කොමිසමේ ඇරැයුමකට අනුව, ඉන්දියාව, බංග්ලාදේශය, මාලදිවයින, රුසියාව සහ නෙදර්ලන්තය නියෝජනය කරමින් පැමිණි එම ජාත්‍යන්තර නිරීක්ෂණ කණ්ඩායමට නිරීක්ෂකයෝ 10 දෙනෙක් ඇතුළත් වෙති.

නිදහස් සහ සාධාරණ මැතිවරණයක් දැකීමට තම අපේක්ෂාව බව ජාත්‍යන්තර නිරීක්ෂණ කණ්ඩායමට නායකත්වය දෙන, ඉන්දියාව නියෝජනය කරමින් පැමිණි ආචාර්ය නසීම් සයිඩි මහතා පැවැසීය ආචාර්ය නසීම් සයිඩි ඔහු මේ බව පැවැසුවේ, කොළඹ ටාජ් සමුද්‍රා හෝටලයේ විශේෂ මාධ්‍ය හමුවකට එක් වෙමිනි.

නිරීක්ෂකයන් පිරිස මැතිවරණ ප්‍රචාරණ කටයුතු සිදුවන ආකාරය නිරීක්ෂණය කළ බවත්, මහ මැතිවරණය පැවැත්වෙන දිනයේ දිස්ත්‍රික්ක කීපයක ඡන්ද මධ්‍යස්ථාන වෙත ගොස් ඔවුන් ඔවුන්ගේ නිරීක්ෂණ කටයුතු සිදු කරන බවත්, ඉන් අනතුරුව ඡන්දය ගණන් කිරීම සහ ප්‍රතිඵල නිකුත් කිරීම ද නිරීක්ෂණය කරන බවත් මාධ්‍යවේදීන් හමුවේ ආචාර්ය නසීම් සයිඩි මහතා පැහැදිලි කළේය

තම කණ්ඩායම මැතිවරණ කොමිසමේ නිලධාරීන්, සිවිල් සංවිධාන සාමාජිකයන් සහ පොලිසිය සමඟ ද සාකච්ඡා කළ බව ද ආචාර්ය නසීම් සයිඩි මහතා වැඩි දුරටත් පැවැසීය.

“ප්‍රජාතන්ත්‍රවාදයට අනුව, රටේ නීති රාමුවට අනුව මැතිවරණ කටයුතු ඉතාමත් සාමකාමීව සිදුවේවි යැයි අපට විශ්වාසයි. මැතිවරණය සම්බන්ධයෙන් මැතිවරණ කොමිසමේ නිලධාරීන්, සිවිල් සමාජ සහ පොලිසිය මහත් කැපවීමෙන් ඔවුන්ගේ දායකත්වය සියයට සියයක් මැතිවරණය වෙනුවෙන් ලබා දෙනවා. මැතිවරණයේ ප්‍රතිඵල නිකුත් වීමෙන් පසු අප අපගේ නිර්දේශ ඇතුළත් වාර්තාවක් මැතිවරණ කොමිසමට ලබා දීමට කටයුතු කරනවා” යැයි ආචාර්ය නසීම් සයිඩි මාධ්‍ය හමුවේ පෙන්වා දුන්නේය.