(විමුක්ති එස්. රුද්‍රිගු)

තුර්කියේ අන්කාරා නුවර සහ පෝලන්තයේ වර්සෝ හි පිහිටි ශ්‍රී ලංකා තානාපති කාර්යාල සමග සමීපව කටයුතු කරමින් යුක්රේනයේ සිටින ශ්‍රී ලංකිකයන් ආරක්‍ෂිතව ඉවත් කරගැනීමට පහසුකම් සපයන බව විදේශ කටයුතු අමාත්‍යංශය ප්‍රකාශ කළේය. 

යුද්ධයට පෙර ශ්‍රී ලාංකික සිසුන් 17 දෙනකු යුක්රේනයෙන් පිටව ගොස් ඇති අතර එතැන් සිට අන්කාරා සහ වර්සෝ තානාපති කාර්යාල සමග සම්බන්ධීකරණයෙන් ශ්‍රී ලංකික සිසුන් 32 නෙක් පෝලන්ත දේශ සීමා හරහා ඉවත් කරගැනීමට පහසුකම් සැලසීමට විදේශ කටයුතු අමාත්‍යංශය ට හැකියාව ලැබී ඇත.

පෝලන්තය හරහා මෙරටට පැමිණීම සඳහා පෝලන්ත දේශසීමාව වෙත ළඟා වෙන යුක්රේනයේ ඉතිරිව සිටින ශ්‍රී ලාංකිකයන් පහත සඳහන් ක්ෂණික දුරකථන අංක ඔස්සේ වර්සෝ සහ අන්කාරා තානාපති කාර්යාල සමග සම්බන්ධ වන ලෙස විදේශ කටයුතු අමාත්‍යංශය නිවේදනය කරයි.

වර්සෝ +48 795 031 376, +48 536 229 694 අන්කාරා +90 534 456 94 98, +90 312 427 10 32 එම අංක වෙයි.

මේ අතර ගොමෙල් රාජ්‍ය වෛද්‍ය විශ්ව විද්‍යාලයේ සහ බෙලරුසයේ ග්‍රොඩිනෝ රාජ්‍ය වෛද්‍ය විශ්ව විද්‍යාලයේ සිටින ශ්‍රී ලාංකික සිසුන්ට තාවකාලිකව තම කැමැත්තෙන් ශ්‍රී ලංකාවට පැමිණීමට අවශ්‍යනම් ඒ සඳහා විදේශ කටයුතු අමාත්‍යංශය රුසියාවේ මොස්කව් හි පිහිටි ශ්‍රී ලංකා තානාපති කාර්යාලය සමග සම්බන්ධීකරණයෙන් පහසුකම් සපයන බවත් පහත සඳහන් දුරකතන අංකයෙන් වැඩි විස්තර ලබාගත හැකි බවත් විදේශ කටයුතු අමාත්‍යංශය පවසයි.

+79 80 144 5726 දේශසීමා සහිත රටවලට ඇතුළුවන විදෙස් ගත ශ්‍රී ලාංකික සිසුන් විදේශ ගමන් බලපත්‍රය, තාවකාලික ගමන් ලේඛන,උප්පැන්න සහතිකයත් ,දේශ සීමාවේ දීර්ඝ කාලයක් රැඳී සිටීමට සිදුවන නිසා ආහාර,ජලය සහ ඖෂධ ප්‍රමාණවත් ලෙස ළඟ තබා ගන්නා ලෙසත් විදේශ කටයුතු අමාත්‍යංශය ඉල්ලා සිටියි.

විදෙස් ගත ශ්‍රී ලාංකිකයන් සහ ශ්‍රී ලංකික සිසුන්ගේ තත්ත්වය පිළිබඳ ශ්‍රී ලංකාවේ සිටින ඔවුන්ගේ පවුල් විදේශ කටයුතු අමාත්‍යංශය විසින් යාවත්කාලීන කරන අතර වැඩි දුර තොරතුරු 011 2338837, 0112335942 දුරකථන අංකයෙන් ලබා ගත හැකි බව විදේශ කටයුතු අමාත්‍යංශය පවසයි.

යුක්රේන-රුසියා අර්බුදය:- වැඩිදුර තොරතුරු සඳහා මෙතැනින් පිවිසෙන්න