(ඉන්දිකා රාමනායක සහ යොහාන් බාසුර)

කොකේන් මත්ද්‍රව්‍ය, මත්මිශ්‍ර මුද්දර, සහ කුෂ් නමැති මත්ද්‍රව්‍ය ළග තබාගෙන සිටි රේගු පරීක්ෂකවරුන් දෙදෙනෙක් පොලිස් මත්ද්‍රව්‍ය නාශක කාර්යාංශය විසින්  අත්අඩංගුවට ගනු ලැබූහ.

මෙලෙස අත්අඩංගුවට ගෙන ඇත්තේ කටුනායක සහ පෞද්ගලික ගුදමක රාජකාරි කරමින් සිටි රේගු පරීක්ෂකවරුන් දෙදෙනකු බවට උසස් පොලිස් නිලධාරියෙක් පැවසීය.

වරායේ රේගු නිලධාරීන් පිරිස් වරාය තුළ ජාවාරමේ නිරත වන බවට පොලිස් මත්ද්‍රව්‍ය නාශක කාර්යාංශය වෙත ලැබුණු තොරතුරු මත එක් රේගු පරීක්ෂකවරයකු පෙරේදා වරායයෙන් පිටවන අවස්ථාවේ චෛත්‍යපාරේ දී අත්අඩංගුවට ගෙන ඇත.

එම සැකකරු සන්තකයේ මත්ද්‍රව්‍ය මිශ්‍ර මුද්දර තොගයක් තිබු බව එම උසස් නිලධාරියා කීය.

සැකකරුගෙන් ප්‍රශ්න කිරීමේ ඔහුට මෙම මත් මුදකර ලබා දෙන සෙසු රේගු පරීක්ෂකවරයා සම්බන්ධයෙන් තොරතුරු හෙළි වු බවත්, වරාය පරිශ්‍රයේ කාමරයක දී එම සැකකරු ද අත්අඩංගුවට ගත් බව ඔහු සන්තයේ කුෂ් නමැති මත්ද්‍රව්‍ය තිබු බව පොලිස් ආරංචි මාර්ග පවසයි.

සැකකරුගෙන් ප්‍රශ්න කිරීමේ ඔහුගේ මෝටර් රථයේ සඟවා තිබු කොකේන් ප්‍රමාණයක් ද අත්අඩංගුවට ගෙන ඇත.

වරාය පරිශ්‍රයේ දී අත්අඩංගුවට ගත් සැකකරු රැඳී සිටි කාමරයක් තුළ තැපෑලය ලැබී තිබු හිස් පාර්සල් කවර තුනක් තිබු බවද පොලිස් ආරංචි මාර්ග පවසයි.

මොවුන් මධ්‍යම තැපැල් හුවමාරුවට පැමිණෙන මත්ද්‍රව්‍ය පාර්සල් සිය බාරයට ගෙන ඒවා අයිතිකරුවන් වෙත මුදා හැරීම හෝ ඒවා තුළ ඇති මත්ද්‍රව්‍ය ජාවාරම්කරන බවට පොලිසිය සැකකරයි.

අත්අඩංගුවට ගත් රේගු පරීක්ෂකවරුන් දෙදෙනා අධිකරණයට ඉදිරිපත් කිරීමට නියමිතව ඇත. පොලිස් මත්ද්‍රව්‍ය නාශක කාර්යාංශය සිද්ධිය සම්බන්ධයෙන් පරීක්ෂණ පවත්වයි.