(මනෝ ප්‍රිය ගුණසේකර)

5 වසර  ශිෂ්‍යත්ව විභාගයේ පළමුවන ප්‍රශ්න පත්‍රයේ  පිටවූ  බව කියන ප්‍රශ්න තුන සඳහා නිදහස් ලකුණු දීමට තීරණය කිරීමට පදනම් වී ඇති විද්වත් කමිටුව වාර්තාව අනුව සියලු සිසුන්ට ලකුණු ලබා දුනහොත්  ගම්බද ප්‍රදේශවල ජීවත්වන සිසුන්ට දැඩි අසාධාරණයක් වන බවත්  ගම්බද ප්‍රදේශවල ජීවත්වන සිසුන්ට ජනප්‍රිය පාසල් වලට ඇතුළත් වීමේ ඇති එකම මාර්ගය ශිෂ්‍යත්ව විභාගය බවත් ජනාධිපති නීතිඥ සාලිය පීරිස් මහතා ශ්‍රේෂ්ඨාධිකරණයේදී  අද (16) පෙන්වා දුන්නේය.

අපොස උසස් පෙළ විභාගයේ කෘෂිකර්ම  ප්‍රශ්න  පත්‍රය පිටවූ බව හෙළි වීමත් සමඟ එම ප්‍රශ්න පත්‍රය අවලංගු කර නව ප්‍රශ්න පත්‍රයක් ලබාදීමට බලධාරීන් කටයුතු කළ පරිදි  ශිෂ්‍යත්ව විභාගයේ මෙම ප්‍රශ්නගත ප්‍රශ්න ඇතුලත් ප්‍රශ්න පත්‍රය සඳහා වෙනම ප්‍රශ්න පත්‍රයක් ලබා දී විභාගය යලී  පැවැත්විය යුතු බව  පෙන්වා දුන් සාලිය පීරිස් මහතා සිද්ධිය සම්බන්ධයෙන්  රහස් පොලිසිය කළ පරීක්ෂණ වලදී ප්‍රශ්න පත්‍රය සැකසීම සඳහා සිටි කමිටුවේ පුද්ගලයකු විසින්ම අදල ප්‍රශ්න පිට කර ඇති බවට තොරතුරු ලැබී ඇතැයිද සඳහන් කළේය.

පසුගිය දා පැවති 5 වසර  ශිෂ්‍යත්ව විභාගයේ පළමුවන ප්‍රශ්න පත්‍රය  අවලංගු කර එම ප්‍රශ්න පත්‍රය සඳහා වන විභාගය නැවත පවත්වන ලෙස විභාග කොමසාරිස් ජෙනරාල් වරයාට නියම කරන අතුරු තහනම්  නියෝගයක් නිකුත් කරන ලෙස ඉල්ලා  ගොනුකර ඇති මූලික අයිතිවාසිකම් පෙත්සම්  හතරක් විභාගයකට ගත් අවස්ථාවේදී පෙත්ම්කාර පාර්ශවයක් වෙනුවෙන් පෙනී සිටි ජනාධිපති නීතීඥ සාලිය පීරිස් මහතා එසේ දැනුම් දුන්නේය.

ශ්‍රේෂ්ඨාධිකරණ විනිසුරුවරුන් වන යසන්ත කෝදාගොඩ , කුමුදුනී වික්‍රමසිංහ, සහ අර්ජුන  ඔබේසේකර යන මහත්ම මහත්මීන්ගෙන් සැදුම්ලත්  විනිසුරු මඩුල්ලක් හමුවේ පෙත්සම සලකා බැලණි.

පහ වසර ශිෂ්‍යත්ව විභාගයට  පෙනී සිටි සිසුන් පිරිසකගේ   මවුපියන් විසින්  ගොනුකර ඇති පෙත්සම්වල වග උත්තරකරුවන්  වශයෙන් විභාග කොමසාරිස් ජනරාල්වරයා ඇතුළු පිරිසක් නම් කොට ඇත.

පෙත්තම විභාගයට ගත් අවස්ථාවේදීපෙත්සම්කාර පාර්ශවය වෙනුවෙන් පෙනී සිටි ජනාධිපති නීතිඥ සාලිය පීරිස් මහතා කරුණු දක්වමින් ශිෂ්‍යත්ව විභාගය ඉතා තීරණාත්මක විභාගයක් බවත් එම විභාගයේදී ලැබෙනහැම ලකුණක්ම වැදගත් බවත් කීය.

ගම්බද ප්‍රදේශවල ජීවත්වන සිසුන්ට ජනප්‍රිය පාසල් වලට ඇතුළත් වීමේ ඇති එකම මාර්ගය ශිෂ්‍යත්ව විභාගය බව විභාගයේදී යම් අසාධාරණයක් සිදුවුවොත් එයමුළු මහත් ශිෂ්‍ය ප්‍රජාවටම බලපාන බවත් පෙන්වා දුන් ජනාධිපදෙනෙක්න සාලිය පීරිස් මහතා පසුගියදා පැවැත්වූ ශිෂ්‍යත්ව විභාගයේ පළමුවන ප්‍රශ්න පත්‍රයේ ප්‍රශ්න තුනක්  පිටවී ඇති බවට තොරතුරු ලැබුණු බවත් අලව්ව ප්‍රදේශයේ උපකාරක පන්තියක එම  ප්‍රශ්න හා සමාන ප්‍රශ්න  ඇතුළත් ප්‍රශ්න පත්‍රයක් ලබා දී ඇති බවත්   සඳහන් කළේය.

සිද්ධිය සම්බන්ධයෙන් රහස්පොලිසිය කල විමර්ශනවලදී මෙම ප්‍රශ්න පත්‍රය සැකසීම සඳහා සිටි කමිටුවේ පුද්ගලයකු විසින් අදාළ ප්‍රශ්න පිට කර ඇති බවට තොරතුරු ලැබී ඇති බවත්  ඒ සම්බන්ධයෙන් කරන  පරීක්ෂණ  මෙතෙක් අවසන් වී නොමැති බවත්  කී සාලිය පීරිස් මහතා තම සේවා දායකයින්මෙම පෙත්සම් ගොනු කිරීමෙන් පසු  අධ්‍යාපන ඇමතිවරිය විසින්  විශේෂඥ කමිටුවකින් පැය 24ක්  තුළ  කරුණු විමසා ඇති අතර එම කමිටු සාමාජිකයන්   විසින්  වෙන වෙනම වාර්තා අධ්‍යාපන අමාත්‍යංශ ලේකම්වරයා වෙත යොමු කර ඇති  බවද සඳහන් කළේය.

විශේෂඥ කමිටුව  ප්‍රශ්න තුනක් පිටවීම පිළිබඳව හැර ඒ සම්බන්ධ අනෙකුත් කරුණු පිළිබඳව අවධානය යොමු කර නොමැති බවද  ප්‍රශ්න පිට කළ බව චෝදනා එල්ල වී ඇති බව කියන ප්‍රශ්න පත්‍ර සැකසුම් මණ්ඩලයේ සාමාජිකයාට සමස්ත ප්‍රශ්න පත්‍රයම නිරීක්ෂණය කිරීමට ඇති හැකියාව සම්බන්ධය එහිදී කිසිදු අවධානයක් යොමු කර නොමැති බවද ජනාධිපති නීතිඥ සාලිය පීරිස් මහතා පෙන්වා දුන්නේය.

වගඋත්තරකරුවන් වෙනුවෙන් පෙනී සිටි නියෝජ්‍ය සොලිස්ට ජෙනරාල් විරාජ් දයාරත්න මහතා කරුණු දක්වමින් අධිකරණයෙන්  කළ දැනුම් දීමකට  අනුව විද්වත් කමිටුවේ නිර්දේශ ලබා ගැනීමට කටයුතු කළ බවත්  අදාළ කමිටුවේ නිර්දේශය අනුව පිටවූ බව කියන ප්‍රශ්න තුන සඳහා නිදහස් ලකුණු ලබාදීමට තීරණය කළ බවද කීය.

ජනපති නීතීඥ සාලිය  පිරිස් මහතා වැඩිදුරටත් කරුණු දක්වමින් නිදහස් ලකුණු ලබාදීම විභාගයට පෙනී සිටි සිසුනට කරන අසාධාරණයක් බවත්  ඇතැම්  සිසුවකු එම  ප්‍රශ්න තුනටම  පිළිතුරු ලියා නොමැති  හෝ ප්‍රශ්න දෙකකට පමණක් හෝ එක් ප්‍රශ්නයකට පමණක් පිළිතුරු සපයා ඇති අවස්ථාවක එවැනි ලකුණු ලබාදීම අසාධාරණ බවත්   පෙන්වා දුන්නේය.