(අංජුල මහික වීරරත්න)

හිටපු ජනාධිපති රනිල් වික්‍රමසිංහ මහතා සමග අල් ජසීරා ජාත්‍යන්තර රූපවාහිනී නාලිකාව කළ සම්මුඛ සාකච්ඡාව අතරතුර උණුසුම් තත්ත්වයක් හට ගත්තේය.

මෙරට පැවති අරගලය, ආර්ථික අර්බුදය සහ පාස්කු ප්‍රහාරය ආදී මාතෘකා කිහිපයක් ගැන මෙම සම්මුඛ සාකච්ඡාවේදී රනිල් වික්‍රමසිංහ මහතාගෙන් ප්‍රශ්න කෙරුණු අතර එහිදී නැගුණු ඇතැම් ප්‍රශ්න හමුවේ රනිල් වික්‍රමසිංහ මහතා දැඩි ස්වරයෙන් පිළිතුරු දෙන ආකාරයක් දැක ගතහැකි විය.

මෙහිදී අල් ජසීරා මාධ්‍යවේදියා රනිල් වික්‍රමසිංහ මහතාගෙන් ප්‍රශ්න නගමින් පාස්කු ප්‍රහාර සම්බන්ධ පරීක්‍ෂණ වලදී ඔබ අසමත් යැයි කතෝලික පල්ලිය ප්‍රකාශ කරන බවත් ඒ ගැන කිව හැක්කේ කුමක්දැයි ප්‍රශ්න කළේය.

ඊට පිළිතුරු දෙමින් රනිල් වික්‍රමසිංහ මහතා පැවසූයේ

"විකාර කියවන්න එපා,

මම කමිටුවක් දැම්මා. ඒ කමිටුවේ නිගමනය එයාලා පිළිගන්නේ නෑ.මේ පිටුපස යම් බාහිර පාර්ශවයක් ඉන්නා බව ඔවුන් කියනවා.මම යන්නේ මේ රටේ බහුතර ජනතාව එක්ක. කමිටු නිර්දේශ පිළිගන්නවාද? නැද්ද? කියන එක පාර්ලිමේන්තුවේ වැඩක්.කාදිනල්ගේ වැඩක් නෙමෙයි" යනුවෙන් පැවසීය.

"මම මේ සම්බන්ධයෙන් ගනුදෙනු කළේ කතෝලික රදගුරු සම්මේලනය සමඟයි.මම ඒගොල්ලන්ට ඕන දේවල් දීලා තියෙන්නේ.ඒගොල්ලෝ ඒ ගැන කිසිම දෙයක් කියන්නේ නැහැ. මම එකක් කියන්නම්, ඔය හැරල්ඩ් පීරිස් රදගුරුතුමා මට හැම වෙලේම කතා කරලා තියෙනවා.මම මේක කියන්න ගියොත් කතෝලික පල්ලියත් දේශපාලනය වෙනවා.

මෙතන ප්‍රශ්නයක් තියෙනවා.ඔයා ඔයාගේ සීමාව පන්නලා තියෙනවා" යනුවෙන්ද හිටපු ජනපති රනිල් වික්‍රමසිංහ මහතා "අල් ජසීරා" අමතමින් වැඩිදුරටත් කීය.