(එස්. ඩි .කොඩිකාර සහ  එන්. කේ. ඉන්ද්‍රවංශ )

බලපත්‍ර රහිතව ව්‍යාජ වෙළඳ නාමයක් යොදා ගෙන රුපියල් ලක්ෂ 15 කට අධික වටිනාකමින් යුත් බීඩි නිෂ්පාදනය කළ අයෙකු සහ ඒවා අලෙවි කිරීම සඳහා ළඟ  තබාගත් ව්‍යාපාරිකයකු  බීඩි 215,700 ක් සමඟ අද (17) අත්අඩංගුවට ගත් බව අකුරැස්ස පොලිසිය කියයි.

අත්අඩංගුවට ගත් සැකකරුවන් දෙදෙනාගෙන් එක් අයෙකු අකුරැස්ස, පෝරඹ  ප්‍රදේශයේ පදිංචි (47) හැවිරිදි පුද්ගලයෙකි.

ඔහු වෙනත් බීඩි සමාගමක නමකට සමාන ව්‍යාජ නමක් යොදාගෙන මෙම බීඩි නිෂ්පාදනය කරන බව මූලික පරීක්ෂණ වලින් හෙළි වී ඇති අතර ඔහුගේ නිවසේ තිබියදී  බීඩි  තොගයෙන් කොටසක් හමු වූ බව පොලීසිය කියයි .

අත්අඩංගුවට ගත් අනෙක් පුද්ගලයා (50) හැවිරිදි අකුරැස්ස ප්‍රදේශයේ පදිංචි ව්‍යාපාරිකයකු වන අතර ඔහුගේ වෙළඳසැලේ තිබියදී  අනෙක් බීඩි තොගය සොයා ගත් බව පොලිසිය කියයි.

බලපත්‍ර රහිතව ව්‍යාජ නමකින් බීඩි  නිෂ්පාදනාගාරයක් පවත්වාගෙන යන බවට අකුරැස්ස පොලිසියට ලද තොරතුරක් මත මෙම වැටලීම සිදුකර ඇත.

අත්අඩංගුවට ගත් සැකකරුවන් අද (17) මාතර මහේස්ත්‍රාත් අධිකරණයට ඉදිරිපත් කිරීමට නියමිත  ය.