(සුජිත් හේවාජුලිගේ සහ අංජුල මහික වීරරත්න )

ආයතන ප්‍රධානීන් තවත් අට දෙනකු පත් කිරීමට උසස් නිලතල පිළිබඳ පාර්ලිමේන්තු කාරක සභාවේ අනුමැතිය හිමිවිය.

මෙසේ අනුමැතිය හිමිව ඇත්තේ අමාත්‍යාංශ ලේකම්වරුන් දෙදෙනකු සහ ආයතන සභාපතිවරුන් හයදෙනකු පත් කිරීම සඳහාය.

ඒ අනුව යමුනා පෙරේරා මහත්මිය කාන්තා, ළමා කටයුතු හා සමාජ සවිබලගැන්වීම් අමාත්‍යාංශයේ නව ලේකම්වරිය ලෙස  පත් කිරීමටද ආර්.එම්.ඩබ්ලිව්. එස් සමරදිවාකර මහතා ජල සම්පාදන සහ වතු යටිතල පහසුකම් සංවර්ධන අමාත්‍යාංශයේ නව ලේකම්වරයා ලෙස පත්කිරීමටද  උසස් නිලතල පිළිබඳ පාර්ලිමේන්තු කාරක සභාවේ අනුමැතිය හිමිව ඇත.

මීට අමතරව සුජීව රාජපක්ෂ මහතා මහජන බැංකුවේ සභාපතිවරයා ලෙස පත්කිරීමටද පත් කිරීමට ද අනුමැතිය හිමිව ඇත.

තවද   එස්. ආර්. ඩී. රෝසා  මහතා    ශ්‍රී ලංකා පරමාණුක බලශක්ති මණ්ඩලයේ සභාපතිවරයා ලෙස පත් කිරීමටද රත්නසිරි කළුපහන මහතා  ශ්‍රී ලංකා රාජ්‍ය ඉංජිනේරු සංස්ථාවේ සභාපතිවරයා ලෙස පත් කිරීමටද  ඉංජිනේරු ඒ. ගල්කැටිය මහතා  ඉංජිනේරුමය කාර්යයන් පිළිබඳ මධ්‍යම උපදේශක කාර්යාංශයේ සභාපතිවරයා ලෙස පත්කිරීමටද ස්ටෙලා මාරපන මහත්මිය  ප්‍රසිද්ධ රැගුම්පාලක මණ්ඩලයේ සභාපතිවරිය ලෙස පත් කිරීමටද  ජයන්ත විජේරත්න මහතා  ශ්‍රී ලංකා ජාතික ජලජීවී වගා සංවර්ධන අධිකාරියේ සභාපතිවරයා ලෙස පත් කිරීමටද අනුමැතිය හිමිව ඇත.

පාර්ලිමේන්තුවේ උසස් නිලතල පිළිබඳ කාරක සභාව කතානායක මහින්ද යාපා අබේවර්ධන මහතාගේ ප්‍රධානත්වයෙන් පාර්ලිමේන්තුවේදී  පසුගිය (12)වැනි දා රැස්විය. මෙම රැස්වීමට  පාර්ලිමේන්තු මන්ත්‍රීවරුන්වන  ඩබ්ලිව්.ඩී.ජේ  සෙනවිරත්න, නීතිඥ  තලතා අතුකෝරළ,  උදය ගම්මන්පිල, වෛද්‍ය  සුදර්ශනී ප්‍රනාන්දුපුල්ලේ සහ  ධර්මලිංගම් සිද්ධාර්ථන් යන මහත්ම මහත්මීහු සහභාගී වූහ.