(ගාමිණී බණ්ඩාර ඉලංගන්තිලක)

මස්කෙළිය, මාවුස්සාකැලේ තේ වතුයායේ, 05 වන කොටසේ වතු කම්කරු නිවාස පේළියක ඊයේ (17) දා රාත්‍රී 11.45 ට පමණ හටගත් හදිසි ගින්නකින් නිවාස 08 ක් දැවී විනාශයට පත්ව ඇති බව මස්කෙළිය පොලීසිය පවසයි.

ගින්නෙන් කිසිදු ජීවිත හානියක් සිදු වී නොමැත. ගින්නට හසුවූ නිවාසවල තිබූ ගෘහ භාණ්ඩ රැසක් විනාශයට පත්ව තිබේ.

මෙම නිවාස පේළියේ වතුකම්කරු නිවාස 12 ක් පිහිටා ඇත. මස්කෙළිය පොලීසියේ නිළධාරීන්, මාවුස්සාකැලේ යුද හමුදා කඳවුරේ නිලධාරින් වතු කම්කරුවන් සමග එක්ව අනෙක් නිවාස වලට ගින්න පැතිර යාම වළක්වා නිවා දමා තිබේ

ගින්නට හසු වූ නිවාස 08 පවුල් 07 ක සාමාජිකයින් 22 ක් පමණ සිටිති.

අවතැන්වූවන් අතර පිරිමි 07 ක් හා ගැහැණු 15 ක් පමණ සිටින බවත්, ඒ අතර පාසල් ළමයින් 05 ක් සිටින බවත් වතු පාලනාධිකාරිය පවසයි. අවතැන්ව සිටින පිරිස මේ වන විට මාවුස්සාකැලේ වතුයායේ පුස්තකාලයේ තාවකාලිකව ලැඟුම් ගෙන සිටිති.

ගින්නට හේතුව මෙතෙක් අනාවරණය නොවී ඇති බවත්, සිද්ධිය සම්බන්ධයෙන් වැඩිදුර පරීක්ෂණ පවත්වන බවත් මස්කෙළිය පොලිස්ථානාධිපති ප්‍රධාන පොලිස් පරීක්ෂක සමන් කුමාර මහතා පැවසීය.