(සිතුම් චතුරංග)
           

වවුනියාව මහ රෝහලේ දැඩිසත්කාර ඒකකයේ වෛද්‍යවරුන් පස්දෙනකු ඇතුළු කාර්ය මණ්ඩලය අද (27) සිට නිරෝධායනයට යොමුකළ බව වවුනියාව සෞඛ්‍ය අංශ කියයි.

වවුනියාව , උළුක්කුලම ජනඋදාගම්මානයේ කාන්තාවක කොවිඩ් 19 වයිරසය ආසාදනයවී මියයෑමත් සමඟ ඇය ප්‍රතිකාර ලැබූ රෝහලේ  පිරිසක් මෙලෙස නිරෝධායනය කර තිබේ.

ශල්‍ය වෛද්‍යවරයකු ඇතුළු වෛද්‍යවරුන් පස්දෙනකු  , හෙද කාර්ය මණ්ඩලය හා උපස්ථාන සෞඛ්‍ය සේවකයින් 18 දෙනකු ඇතුළු 23 දෙනකු එලෙස නිරෝධායනයට ලක්කොට ඇතැයිද සෞඛ්‍ය අංශ පැවසීය.

එමෙන්ම වෛරසය ආසාදිත කාන්තාව ජීවත්වූ උළුක්කුලම ජන උදාගම්මානයේ ගම්මානයේ කොටසක නැවත දැණුම් දෙනතෙක් හුදකලා කිරීමට පියවරගත් බවද වවුනියාව දකුණ ප්‍රාදේශිය සෞඛ්‍ය වෛද්‍ය නිලධාරී කාර්යාලය පැවසීය.
           

කිසියම් රෝගී තත්වයක් හේතුවෙන් උළුක්කුලම ප්‍රදේශයේ පදිංචි 62 හැවිරිදි කාන්තාවක් පසුගිය 20 වැනිදා වවුනියාව රෝහල වෙත ඇතුලත් කොට ඇති අතර රෝගී තත්වය උත්සන්න වීම හේතුවෙන් ඇය වවුනියාව මහ රෝහලේ දැඩිසත්කාර ඒකකය වෙත යොමුකොට තිබේ.        

එම කාන්තාව ප්‍රතිකාර ලබන අවස්ථාවේ ඇයට උණ වැළදී ඇති අතර පසුව සිදුකළ පී.සී.ආර් පරීක්ෂාවකදී කොවිඩ් - 19 වෛරසය ආසාදනයවී ඇති බවට අනාවරණයවූ බව සෞඛ්‍ය අංශ පැවසීය.