(ඩයනා උදයංගනී)

දිනෙන් දින උග්‍ර වන අර්බුදකාරී වටපිටාව තුළ සෞඛ්‍ය පද්ධතිය බිඳ නොවැටී පවත්වා ගැනීමට නම් ඖෂධ හිඟයට හා සෞඛ්‍ය කාර්ය මණ්ඩලවල ඉන්ධන පිළිබඳ ගැටලුවට කඩිනම් විසඳුම් ලබාදිය යුතු බව රජයේ වෛද්‍ය නිලධාරීන්ගේ සංගමය පවසයි.

මේ වන විට මතුවෙමින් පවතින තත්වයන් නිසි ලෙස කළමණාකරණය නොකළහොත් සෞඛ්‍ය පද්ධතියේ තීරණාත්මක බිඳ වැටීමක් සිදුවීම වැලැක්වීමට නොහැකි වනු ඇතැයි එම සංගමයේ ලේකම් වෛද්‍ය හරිත අලුත්ගේ මහතා පැවසීය.

විශේෂයෙන්ම අත්‍යාවශ්‍ය ජිවිතාරක්ෂක ඖෂධ ඇතුලු රෝගී තත්වයන් සඳහා සුලභව භාවිතා කරන ඖෂධවල හිඟය හා පවතින ඉන්ධන අර්බුදය හමුවේ වෛද්‍යවරුන් ඇතුලු සෞඛ්‍ය කාර්ය මණ්ඩලයට රෝහල් වෙත වාර්තා කිරිිමට ඇති වන බාධාකාරී තත්වයන් යන කරුණු සඳහා කඩිනමින් ප්‍රායෝගික විසඳුම් ක්‍රියාත්මක කළ යුතු බව වෛද්‍යවරයා සඳහන් කළේය.

රෝහල් පද්ධතිය තුල මේ වන විට පවතින ඖෂධ හිගය ආර්ථික අර්බුදය හරහාම නිර්මාණය වු තත්වයක් නොවන බවත්, ඖෂධ ලියාපදිංචිය, ඇණවුම් කිරීම හා බෙදාහැරීම යන පියවරයන්හි පවතින අකාර්යක්ෂමතාවය හා දුෂිත ගණුදෙනු මේ සදහා ඍජුවම බලපෑ බවත් වෛද්‍ය හරිත අලුත්ගේ මහතා කීවේය.  

ඖෂධ මිලදි ගැනීම සඳහා බාධාවකින් තොරව අවශ්‍ය මුදල් ලබාදීම,  දිවයින පුරා රෝහල් පද්ධතිය තුල ඖෂධ භාවිතා කිරීමේ රටාවන් හඳුනාගෙන ඒකාකාරී ලෙස අඛණ්ඩ සැපයුමක් සහතික කිරීම,  මේ වන විටත් ලැබී ඇති හා ලැබෙමින් පවතින ඖෂධ ආධාර හා පරිත්‍යාග නිසි ලෙස කලමණාකරණය කර කාර්යක්ෂමව දිවයින පුරා බෙදාහැරීම ඉතා වැදගත් බවත්, රෝහල් වෙත ඖෂධ ඇතුලු සියලු පහසුකම් ලබා දුන්නත් රෝගීන්ට ප්‍රතිකාර කිරීම සඳහා රෝහල් තුල වෛද්‍යවරු ඇතුලු කාර්යමණ්ඩල සිටිය යුතු නිසා රට තුළ ඇති සීමිත ඉන්ධන තොග භාවිතය සඳහා නිසි ප්‍රමුඛතා ලැයිස්තු සකස් කර සෞඛ්‍ය සේවාවට ද අවස්ථාවක් ලබාදීම කඩිනමින් කළ යුතු බව ඔහු ප්‍රකාශ කළේය.

එසේ නොමැති වුවහොත් වැඩවර්ජන ක්‍රියාමාර්ගවලටවත් කිසිඳු විටෙක සම්බන්ධ කර නොගන්නා පිලිකා, මාතෘ හා ළමා රෝහල් හා වකුගඩු රෝහල් ඇතුලු සමස්ථ රෝහල් පද්ධතියම කඩා වැටෙනු ඇතැයි හෙතෙම කීය.