(සුජිත් හේවාජුලිගේ සහ  අංජුල මහික වීරරත්න)

සීගිරිය වන රක්ෂිතයේ  ඇතැම් දේශපාලනඥයන් වරින් වර පුද්ගලයන් පදිංචි කරවීමෙන් එම රක්ෂිතයට හානි සිදුවෙමින් පවතින බව ගම්පහ දිස්ත්‍රික් පාර්ලිමේන්තු මන්ත්‍රී ඉංජිනේරු අජිත් මාන්නප්පෙරුම මහතාගේ  ප්‍රධානත්වයෙන් යුතු  පරිසරය ස්වභාවික සම්පත් සහ  තිරසර සංවර්ධනය පිළිබඳ පිළිබඳ ආංශික අධීක්ෂණ පාර්ලිමේන්තු කාරක සභාවේදී තොරතුරු අනාවරණයවී ඇත.

එසේම සීගිරිය වන රක්ෂිතය ගැසට් කිරීමට පෙර පදිංචි අයගේ අයිතිය ආරක්ෂා කරන ලෙසටද  කමිටුව නිර්දේශ කර ඇත.

ගැසට් කිරීමට පෙර පදිංචිව සිටි පදිංචිකරුවන් සහ ඊට පසු පදිංචි වූ පුද්ගලයන් පිළිබඳව කමිටුවක් පත් කර තොරතුරු සොයා බලා ඉදිරිපත් කරන ලෙස  කමිටුවේ සභාපති අජිත්  මාන්නප්පෙරුම මහතා දිස්ත්‍රික්  ලේකම්වරයාට උපදෙස් දුන්නේය.

වන සංරක්ෂණ හා වනජීවී රක්ෂිතවල ඇති පෞද්ගලික ඉඩම් රජයට අත්පත් කර ගැනීමේ ක්‍රියාවලිය කඩිනම් කරන්නැයි  පරිසරය ස්වභාවික සම්පත් හා අතිරසර සංවර්ධනය පිළිබඳ ආංශික අධීක්ෂණ කාරක සභාව අදාළ නිලධාරීන්ට නිර්දේශ කර ඇත.

එසේම රටේ වන රක්ෂිතය  සියයට 29.5 සිට 32 දක්වා වැඩි කිරීමට සැලසුම් සකස් කරන ලෙසද එම කමිටුව නිර්දේශ කර ඇත.