(ඩයනා උදයංගනී)

කොරෝනා තෙවැනි රැල්ල පාලනය කිරීම වෙනුවෙන් මසක පමණ කාලයක් පනවා තිබූ සංචරණ සීමා අද (21) අලුයම 4.00 සිට ලිහිල් කිරීමෙන් අනතුරුව ජනතාව විශාල වශයෙන් නගර හා වෙළඳසැල් වෙත රැස්ව සිටිනු දක්නට ලැබිණි.

සංචරණ සීමා ඉවත් කිරීම සිදුකර ඇත්තේ දැඩි කොන්දේසි යටතේ වන අතර පළාත් අතර සංචරණ සීමා තවදුරටත් ක්‍රියාත්මකය. එමෙන්ම කොරෝනා වසංගත අවදානම හේතුවෙන් දිස්ත්‍රික්ක 12ක ග්‍රාම නිලධාරී වසම් 24ක් හුදෙකලා කිරීමට ද පියවර ගෙන ඇත.

සංචරණ සීමා ඉවත් කෙරුණු ඊයේ දිනයේදී මාර්ගවල දැඩි රථ වාහන තදබදයක් ද දක්නට ලැබිණි.

බස් රථ, දුම්රිය ඇතුළු පොදු ප්‍රවාහන සේවා ක්‍රියාත්මක වූයේ සීමිත වශයෙන් බැවින් බොහෝ දෙනෙක් තම කටයුතු සඳහා පෞද්ගලික වාහනවලින් පැමිණීම හේතුවෙන් මාර්ගවල විශාල රථවාහන ප්‍රමාණයක් පැවතීම මෙම රථවාහන තදබදයට හේතු විය.

බස්නාහිර පළාත තුළ ධාවනය වූයේ දුම්රිය හා බස් රථ සීමිත ප්‍රමාණයක් වූ බැවින් රාජකාරී සඳහා පැමිණි ජනතාව පීඩාවට පත් ව අතර දුම්රියවල ආසන ගණන ඉක්මවා මගීන් ගමන් කරනු ද දක්නට ලැබිණි.

දුම්රිය ගමන් වාර ඉතා අඩු ප්‍රමාණයක් ක්‍රියාත්මකවීම නිසා මෙම තත්වය ඇතිව තිබිණි.

පොදු ප්‍රවාහන සේවා සඳහා අවසර දී ඇත්තේ ද සීමා යටතේ වන අතර විශේෂයෙන් බස්නාහිර පළාත තුළ පොදු ප්‍රවාහන සේවාවලින් ගමන් කිරීමට අවසර දී ඇත්තේ අත්‍යාවශ්‍ය සේවා සඳහා පැමිණෙන සේවක පිරිස්වලට පමණි.

සෙසු පළාත්වල ආසන ධාරිතාවයෙන් සියයට 50ක් වන සේ පොදු ප්‍රවාහන සේවාවලින් මගීන් රැගෙනයාමට අවසර දී ඇත.

මීට අමතරව බැංකු, උකස් මධ්‍යස්ථාන, මත්පැන් අලෙවිසැල්, සතොස හා සුපිරි වෙළඳසැල්, සිල්ලර වෙළඳසැල් ඉදිරිපිට ද ජනතාව විශාල වශයෙන් පෝලිම් ගැසී සිටිනු දක්නට ලැබිණි.

දිවයින පුරා ආර්ථික මධ්‍යස්ථාන ද තොග වෙළඳාම සඳහා විවෘත කෙරුණු අතර ඒවායින් භාණ්ඩ මිලදී ගැනීම සඳහා ද විශාල පිරිසක් පැමිණ සිටිනු දක්නට ලැබිණි.

ඒ ඇතැම් ස්ථානවල නියමිත පරතරය පවා නොතකා ජනතාව පොරකමින් රැඳී සිටිනුද දක්නට ලැබිණි.

නමුත් සියලු දෙනා පාහේ මුහුණු ආවරණ පැළඳ සිටියහ.

(ඡායාරූප: ළහිරු හර්ෂණ)

(ඡායාරූප: ඩිලාන් ද සිල්වා)