(රන්ජන් කටුගම්පොල සහ නිමන්ති රණසිංහ)

ශ්‍රී ලංකා පොදු ජන පෙරමුණු පක්ෂ මූලස්ථානයේ පැවැති ප්‍රවෘත්ති සාකච්ඡාවකදී පාර්ලිමේන්තු මන්ත්‍රී සනත් නිශාන්ත මහතා අධිකරණයට අපහාස වන අයුරින් සිදුකළායැයි කියන ප්‍රකාශය සම්බන්ධයෙන් විභාගයක් පවත්වා සුදුසු පියවරක් ගන්නා ලෙසට ඉල්ලා ඉල්ලමින් නිතීඥ ප්‍රියලාල් සිරිසේන මහතා අභියාචනාධිකරණයට අද (29) පෙත්සමක් ගොනුකරනු ලැබ ඇත.

මෙම පෙත්සමේ වගඋත්තරකරුවන් ලෙස නම්කර ඇත්තේ පාර්ලිමේන්තු මන්ත්‍රී සනත් නිශාන්ත, ශ්‍රී ලංකා නිතීඥ සංගමය සහ නිතිපතිවරයා ය.

මෙම පෙත්සමේ පළමු වගඋත්තරකරු ඉකුත් මැයි මස 09 වන දින ගාලු මුවදොර අරගල භූමියට පහරදීමේ සිද්ධිය සම්බන්ධයෙන් කොටුව මහේස්ත්‍රාත් අධිකරණයේ විභාග වන නඩුවේ සැකකරුවකු වන අතර, මීට පෙරද අපරාධ සිද්ධීන් සම්බන්ධයෙන් චෝදනා එල්ලවී ඇති අයකු බව ද පෙත්සම්කරු සිය පෙත්සමේ සදහන් කර ඇත.

ශ්‍රී ලංකා පොදු ජන පෙරමුණු පක්ෂ කාර්යාලයේදී ඉකුත් 23 වැනිදා පැවැත්වූ මාධ්‍ය සාකච්ඡාවකට සහභාගී වූ මෙහි පළමු වගඋත්තර පාර්ලිමේන්තු මන්ත්‍රිවරයා අධිකරණයට අපහාස වන අයුරින් කරුණු දක්වනු ලැබූ බවත් මෙමගින් සමස්ථ අධිකරණ පද්ධතියටම අපහාසයක් සිදුව ඇති බවත් පැමිණීලිකාර නිතීඥවරයා සිය පෙත්සමෙන් කරුණු ඉදිරිපත් කර තිබේ.